Pu C.Ngunlianchunga, AH&Vety Minister chuan nimin (17.6.2016) zirtawpni khan Aibawk khuaa Bulk Milk Producers Cooperative Society Milk Collection Centre a bawnghnute dahkhawlna (Bulk Milk Cooler,BMC) a hawng a. Pu K.S Thanga, Parliamentary Secretary leh bialtu MLA leh Pu H.Zothangliana, Parliamentary Secretary ten he hun hi an hmanpui bawk a ni.

Pu C.Ngunlianchunga chuan AH & Vety Department in khaw panga (5) Aibawk, Bungtlang ‘S’, Kawrthah, Bualpui ‘NG’ leh Lungbun-ah dispensary dah tura hmalak mek anih thu a sawi a, Sawkar-in kut hnathawktute a dah pawimawh ang takin an mahni pawhin an tana hmalakna hrang hrangte chu ngai pawimawh turin a chah a, BMC hawn thar pawh Aibawk khua amite mai bakah helai tlangdunga ranvulhtu ten hmang tangkai turin a chah bawk. Bawnghnuteah Mizoram hi kan intodelh thei a ni tiin Minister chuan ramdanga kan pawisa luangchhuak venna tha tak a ni a ti.

Pu K.S Thanga chuan BMC chu bial hmasawnna atan hmanrua tha tak a ni a, mipui ten theihtawpa chhawr tangkai turin a chah a, hlawhtling tur chuan mipuite hian tum nghet tak kan neih a tul thu sawiin kan tangho tlat chuan dinhmun sangah kan in hlangkai thei a ni a ti bawk.

He Bawnghnute dah khawlna (Bul Milk Cooler) hi indian Dairy Machinery Company Ltd. (IDMC) Gujarat siam niin Bawnghnute litres 1000 a dawng a. Power Supply awm loh huna hman turin Diesel Generator 10KVA a keng tel bawk a ni. He khawl hi bawnghnute sawrhlim, sawngbawlna hmun thlenpui hmaa a chhiat mai loh nan leh a quality vawn that nan a lo dah khawlna leh dah vawhna a ni a, he khawl hian bawnghnute hi 40 aia sang lovah vawng daiin a vawng tha thin a, hei hi a phurhna tur bik motor (Road Milk Tanker) hmangin MULCO Dairy Plant a phurh thlen thin a ni.

Hawnna inkhawm hi Pu Vanlalchhunga, Chairman MULCO in a kaihruai a, Dr.Lalremliana, Managing Diretor, MULCO in report pein bawnghnute vawn thianghlim chungchanga hriattur pawimawhte a sawi bawk a ni.