National Commission for De-Notified Nomadic and Semi-Nomadic Tribes (NCDNT) Member-Secretary Pu H.K. Das, IAS (retd.) chuan zan khat riaka Mizoram rawn tlawhin nimin tlai dar 5:00 khan State Guest House Conference Hall-ah Mizoram Social Welfare Department hotute nen an inkawm a, Social Welfare Department Secretary Pu P.Lalchhuanga, IAS in Mizoram Sawrkar aiawhte hi a ho a ni.

Pu Das-a chuan Mizorama a rawn kal chhan sawiin NCDNT chu Sawrkar laipuiin Ministry of Social Justice and Empowerment hnuaiah India ram chhunga hnam tenau chenna hmun nghet nei lova in sawn reng thin te hmasawnna tur ngaihtuah tura a din  a ni a ti a, Kumpinu sawrkarin Criminal Tribes Act, 1871 hmangin Tribal hnam chi hrang hrangte chu hnam kawlhsen leh hnufual, pawikhawih ching tiin a chhinchhiah a, India in zalenna a hmuh hnu khan Sawrkarin kum 1952 ah Parliament ah Dan thar The Habitual Offenders Act siamin Criminal Tribes Act chu a thiat a, Ayyengar Committee dinin he Committee hian hnam hnufual chi hrang hrang 193 chhinchhiahin heng hnam tenau te hi tute nge ? tunah khawiah nge an awm a, eng dinhmunah nge an din ? tih chu an hriat tum ber anih thu leh chenna nghet nei lova insuan kual reng chi an la nih leh nih loh te, mipui nawlpui zingah an insenglut tawh anih pawhin an khawsak phung leh an dinhmun eng nge tih te, dawmkan ngaiin an la awm em ? tih te chu an ngaihven ber anih thu te a sawi a, Ayyengar Committee chhinchhiah danah Mizoramah hetiang hnam hi 12 lai an la awm thu sawiin chung hnam hrang hrangte dinhmun chu lo zirchiang a NCDNT a thehlut turin Mizoram sawrkar aiawhte chu a ngen a, December, 2017 ral hma a Sawrkar Laipuia report thehlut tura tih an nih avangin chak taka hma lak a tul thu a sawi bawk. Pu Das-a chuan heng hnam hrang hrangte hi State Sawrkarin a lo zawnchhuah a, an dinhmun chawikanna tura State Sawrkar hmalak dan te hriat anih a zirchian anih hnu ah mumal takin thlutlukna a siam theih dawn a ni tiin hemi chungchangah hian State Sawrkar ngaihdan pawh an ngaihpawimawh ber dawn thu a sawi bawk a ni.

Pu P. Lalchhuanga, IAS, Secretary, SWD pawhin NCDNT chu an tan thil thar anih thu sawiin tun dinhmunah chuan Mizoram chhungah semi-nomadic leh nomadic tribe an awm lova a hriatthu leh hnam tenau leh awmna kilkhawr deuh te pawhin family ration card an neih vek thu a sawi a, Commission duh dan te an zirchian dawn thu leh hnam tenau list Commission in a pek pawh chu uluk taka an lo zirchian tur thu sawiin mipuite hnenah pawh hetiang hnam chenna mumal nei lova insuan kual reng Mizoram chhunga an awm anih chuan sawrkar hrilh hre tura an ngen tur thu a sawi a, theihtawp chhuah a NCDNT an tawiawm tur thu a sawi bawk.

Pu HK Das hian nizan khan Mizoram Larsap Lt.General Nirbhay Sharma (Retd.) chu a chenna Raj Bhavan ah kawmin vawiin chawhnu hian Delhi panin a kir leh ang.

Attachment

  • Loading attachment...