Vawiin khan State Guest House Conference Hall-ah Union Minister for Agriculture Pu Radha Mohan Singh hovin Mizoram sawrkara official-te’n meeting pawimawh an nei.

Meeting-ah hian Agriculture, Horticulture, Animal Husbandary & Veterinary, Fisheries leh Soil & Water Conservation Department atangin Secretary, Director leh Official dangte an tel a. Mizoram sawrkarin Central Sawrkar scheme hrang hrang an thawh mek - Rashtriya Krishi Vikas Yojana(RKVY), National Food Security Mission, Pradhan Mantri Krishi Sinchayee Yojana (PMKSY), Horticulture Mission For North East And Himalayan States, Paramparagat Krishi Vikas Yojana (PKVY),Sub Mission on Agricultural Mechanization (SMAM), National Mission on Oil Palm leh a dangte kaltlanga hna an thawh dan a sawipui a. Heng scheme hrang hrang atana hnathawhna tur sum department kuta awm tawh te leh an la hmuh belh beisei zat te atanga chhuta hma an lak chin leh an chhunzawm dan tur report te ngaihthlak a ni.

Union Agriculture Minister hian thla ruk hnuah Mizoram tlawh leh a tum thu sawiin scheme hrang hranga hna an thawh dan chipchiar taka data vawng turin a hrilh a. Hnathawhna tur sum release a ran zawk theih nan Utilization Certificate (UC) thehlut zung zung turin a hriattir a ni. Minister chuan an hnathawhte mipuiin awlsam taka an hriat theih nan leh an hman tangkai thiam theih nan puanzar lamah tan la turin a chah a. Central Scheme te chak zawka bawhzui a nih theih nan Agriculture leh a kaihnawih department ten State pum huap Coordination Committee leh District level committee din tha a tih thu a sawi bawk.

Pu Radha Mohan Singh hian vawiin chawhnu khan Mizoram a chhuahsan nghal a ni.