Pu H.Rohluna, FCS & CA leh Environment & Forest Minister chuan March ni 4 khan Murlen khua Sailo Lalthuama khua-in an khua Murlen kum 75-na Platinum Jubilee lawmna a hmanpui a. Minister hian Khuallian-a an sawmna chu a ngaih pawimawh thu sawiin ‘Mihring pawh kum 75 hi chu puitling thankin kan ni tawh a, mi tam takin an thlen theih loh, mi tlemte chauhvin an thlen theih a nih avangin a hlu hle a ni. Murlen khua pawh hian Jubilee puala rilru, ngaihtuahna senga rinawmna leh hmasawnna rilru pu chung zela in kal ka duh a. National Sanctuary-in a hual vel khua in ni a, Nungcha humhalhna kawngah leh ramngaw humhalhna kawngah mawhphurhna sang tak in nei a ni,” a ti a, kangmei lakah fimkhur turin a chah bawk.

Minister hian a kal lamah Khawzawl rama silai nena sava veh lai nangchingin, tun hnuah ti tawhlo turin tha takin a hrilh a. Champhai-ah riak chhovin Champhai-ah h ian Official leh V/C ten an lo hmuak a, Champhai DFO Pu Vanlalvena hoten tlaivara an lo buaipui Far ting (Pine log) an man khawmte chu a hmunah a en nghal a. Forest Plantation chhunga thing phurh nana an hman motor 2 leh mihring an man te hi Forest Deptt. lam hotuten Case an lo siam tawh a ni.

March ni 5 hian Bialtu MLA Pu T.T.Zothansanga’n Closing Function a hmanpui bawk. Murlen khua hi khaw te tak ni mahsela, mithiam tam tak an lo chhuak tawh a, Pastor 18, Ph.D 5, Doctor 2 leh Gazetted Officer 8, BA chin chunglam mi 164, sipai arsi Captain chin chunglam mi 12 an lo chher chhuak tawh a ni. Tun dinhmunah Murlen khua hi In 85 an ni a, mipa 306, hmeichhia 248 an cheng mek a ni.

Minister Pu H. Rohulna hi Pu Liankima Lailung, Conservator of Forest Wildlife, Pu Lalnunzira, DFO, Wildlife, Khawzawl, Pu Lalhmingliana, DCSO Champhai, Pu C.Vanlalena, DFO Champhai leh Pu Ramdingliana Rokhum, Private Secretary ten an tawiawm a ni.