2328/2026-2027

Dated Khawzawl, the 23rd September, 2026 : Vawiin khan Chawngtlai leh Tualte khua-ah ni thum awh tur Pluck & Pay Festival neih tan a ni a. He Festival-ah hian Block Mission Management Unit, Mizoram State Rural Livelihoods Mission (MzSRLM), Khawzawl RD Block leh NABARD te tangho-in Block Mela buatsaih a ni bawk. 

Block Mela hawnna inkhawmah hian Block Development Officer Pu Timothy R. Lalhmangaiha chuan thu sawiin, Pluck and Pay Festival-a Block Mela neih phal saktu Festival Organising Committee chungah lawmthu a sawi a. Kuthnathawktute tana MzSRLM leh NABARD hmalakna hi fakawm a tih thu a sawi bawk a. Hun leh tha senga stall hawngtute chungah pawh lawmthu sawiin, Festival chhunga a tam thei ang ber an inhralha, hlawk taka hmang turin duhsakna a hlan a ni.

He Block Mela-ah hian Khawzawl District chhung khaw hrang hrang atanga Self Help Group member 30-ten stall 15 hawngin, ni thum chhung an thil siam chhuah leh an thar chhuahte an pho chhuak dawn a. Passion Fruit, Kiwi Juice, Grape Juice, Banana Juice, Pineapple Juice, handloom leh handicrafts te bakah thil siam chhuah dang hrang hrangte pawh lei theih turin chhawpchhuah a ni ang.