972/2025-2026

Khawzawl, dated 27th June, 2025: Vawiin chawhma dar 11 khan DRDA Conference hall, Khawzawlah NECTAR bultumin PM-DevINE Organic Project hnuaia Master Trainers te tan training materials leh smart phone semna hun neih a ni a, Dr. KC Lalmalsawmzauva, Adviser to the Chief Minister chu khuallian niin, khual zahawm hi Pu K. Vanlalthiana, Deputy Commissioner, Khawzawl District a ni a, Dr. Collin Z. Renthlei, Adviser (T), NECTAR in hun a kaihruai.

He hunah hian Khuallian, Dr. KC Lalmalsawmzauva chuan Technology tangkaina leh pawimawhna sawifiahin, hmang tangkai tur chuan kum lama upa zawk te aia thalai zawkte an pawimawh thu leh hmasawn a in zir zel a pawimawh thu a sawi a. Organic thil reng reng a man a san tawh thu leh Khawvelin a buaipuizia sawiin, “Organic State” ni turin Mizoram sorkar pawh nasa takin a in puahchah thu a sawi. Kalkhawmte chu tun hmaa rilru puthmang paih bo a hun tawh bakah thlen chin zela hmasawn tum theuh turin a fuih bawk. Khuallian hian smartphone leh training material semna hun a hmang bawk a ni.

Khual zahawm, Khawzawl Bawrhsap, Pu K. Vanlalthiana chuan kalkhawmte chu eiruk pawizia sawiin rinawm taka an hna thawk theuh turin a fuih a, nitin mamawh tharchhuak tur a taimak a tul thu leh District dangte entawn ni thei tur a theihtawp a ke pen zel turin kalkhawm te a chah.

He hunah hian Pu Rakesh Kr Sarmah, Chief Coordinator (Technical), NECTAR chuan PM-DevINE hnuaia "Promoting Scientific - Organic Agriculture in North East India" chungchang sawifiahna hun a hmang a, Pu Samuel Lalliansanga, Deputy Director, Agriculture leh Er. H. Lalsawmliana, Chief Scientific Officer, MISTIC te'n thu an sawi bawk a ni.

He hunah hian Pu Suvigya S. Chandra, IAS, SDO (Sadar), Dr. Prabhat Borpuzari, Regional Officer, PM-DevINE Organic, NECTAR te leh Khawzawla line department hrang hrang ten an hmanpui a ni.