971/2025-2026

Saitual, the 27th June, 2025: Vawiin khan Chawnpui YMA Hall, Saitual PWD Vengah, ‘75 years of National Sample Survey’ tih thupui hmangin 19th National Statistics Day lawmna hun hman a ni a, District Bawrhsap Dr. Lalngura Tlau chu khuallian niin hun a hmanpui.  

He hunah hian District Bawrhsap Dr. Lalngura Tlau chuan thu a sawi a, National Statistics Day vawi 19 lawmna hun an hmang thei chu lawmawm a tih thu sawiin, statistics chu ram hmasawnna innghahna pawimawh tak a ni, a ti.  Bawrhsap chuan inchhiarpui ‘census’ chu covid avangin 2021 khan neih a ni lo a, kum 2026 leh 2027-ah te phase 2-a kalpui tura rua hman a ni tih a sawi a, census thara data hi a tangkaiin, sawrkar atanga ruahmanna siamna kawngah pawh nasa takin a pui dawn a ni, a ti. 

Bawrhsap chuan kawng hrang hranga hmasawnna kalpui a nih dawn hian data hmanga zirchianna (survey) neih thin a ni tih a sawi a, Saitual District chuan data a neih that tawk loh avangin ruahmanna (planning) siam kawngah te harsatna an tawh thin thu a sawi a. Saitual District chu District naupang tak a nih avangin DRO Office changtlung a la awm thei lo tih sawiin, DRO Office changtlung zawk leh Saitual District mipui te ei leh bar zirchianna “Economic Survey” neih theih hun a awm a beisei thu a sawi bawk. Bawrhsap chuan DRO Office a thawktute chu data dik leh rintlak la khawm a, khawtlang mipuite tana hmasawnna thlen thei tura theih tawp chhuah zel turin a fuih nghal a ni.

India rama statistician ropui tak Professor Prasanta Chandra Mahalanobis-ina India ram tana economic planning, statistics leh policy making kawnga a hnathawh ropui tak hriat reng nan a piancham June ni 29-ah hian ‘National Statistics Day’ hman thin a ni a. Kumin hian June ni 29 hi Sunday-a a tlak avangin a lawmna pui ber hi June ni 30-ah New Delhi-ah neih a ni ang a, remchan zawkna avangin Mizoramah chuan District tinah June ni 27-ah neih a ni thung. 

Vawiin National Statistics Day lawmna hun hi Pu Lalnghinglova, DRO chuan a kai hruai a, District Bawrhsap Dr. Lalngura Tlau chuan thu sawiin, Pu Isak Malsawmtluanga, DRO Office chuan lawmthu sawinain hun a khar a ni. Vawiin inkhawmah hian khawtlang hruaitute, NGO hotute leh Presbyterian English School zirlai naupang leh zirtirtute an tel a ni.