No.4215/2020-2021

Vawiin tlai Dar 4:30 khan Shri Hardeep S. Puri, Union Minister of State, Ministry of Housing & Urban Affairs kaihhruaina hnuaiah PM SVANidhi chungchangah video conference meeting, CS Video Conference Room-ah neih a ni a.  Deputy Chief Minister Pu Tawnluia hovin UD&PA leh Home Department officials te an tel a ni.

Union Minister Shri Hardeep S. Puri chuan PM SVANidhi chu khawlaia thil zuar leh inpho thinte (street vendors) hripui COVID-19 lengin an eizawnna nasa taka a nghawng avang leh inkharkhip anih hmaa an sum khawlte inkharkhip hun chhunga an dehral avanga eizawnna bul an tan leh theih nan, central sawrkar in July ni 25, 2020 atanga a kalpui thu a sawi a. Street Vendor te’n leirem an rah theihna tur Scheme kaltlang hian Working Capital Loan Rs 10,000/- thleng pek tura duan a nih thu leh loan la tur tan guarantor neih a ngaihloh thu sawiin, state lian zawk Maharastra, Uttar Pradesh, Bihar-ah mi tam takin intundin nan an hman thu a sawi a ni.

Deputy Chief Minister Pu Tawnluia chuan COVID-19 hripui len laia Union Minister Shri Hardeep S. Puri in kawnga thil zuarte (street vendors) tana scheme pawimawh tak PM SVANidhi chungchangah, Video Conference kaltlanga meeting a ko chu lawmawm a tih thu a sawi a. PM SVANidhi  hi Mizoram-ah  hlawhtling tak hman a nih theih nan UD & PA Department chuan survey uluk takin a neih thu sawiin,  khawpui chhunga khawlaia thil zuarte leh inpho mi 2777 register an nih tawh thu leh Smart Certification pawh pek an nih tawh thu a sawi a. Heng mi 2777 zingah  mi 334 ten PM-SVANidhi hnuaiah loan dil an awm thu leh mi 28  hnenah loan pek fel an nih tawh thu a sawi bawk a ni. 

Deputy Minister chuan Mizoram chu hun reilo te chhunga  loan pek percentage sanna ber dawttu state a ni, tih a sawi a, India ram hmun thenkhatah street vendor ten harsatna anneih ang chu Mizoram-ah a awm ve loh thu sawiin, Home Department te nena lungrual taka thawhhona a awm vang a ni, tiin Union Minister hnenah hian a sawi a. Mizoram-ah hlawhtling taka PM SVANidhi Scheme kalpui a nih nan Mizoram sawrkar chuan hma a lak zel tur thu a sawi bawk a ni.

Deputy Chief Minister hi UD & PA Secretary Dr C. Vanlalramsanga leh IGP (Law & Order) Pu Shanliana, AMC Commissioner Pu K.Laldingliana leh midangten an tawiawm a ni.