Urban Development and Poverty Alleviation (UD&PA) Department hnuaia mission pakhat PMAY – Housing For All (Urban) Lawngtlai District Screening Committee chu vawiin (21.9.2016) chawhma dar 11 khan Lawngtlai DC Conference Hall-ah an Chairman, Lawngtlai DC Dr A.Muthamma hovin an thu khawm.
He hunah hian Lunglei District Urban Development Officer Er Andrew Lalhruaia chuan powerpoint presentation hmangin member-te hnenah Beneficiary Led Construction (in sak tanpuina) leh Credit Linked Subsidy Scheme (in sak tanpuina loan) chungchang a hrilhfiah a. Lawngtlai khawpui chhunga mi rethei in sak tanpuina kal zelah, Department-in a scheme atanga tanpuina diltute an chenna in ngeia an enfiah vek hnua an hmuh dan te he hunah hian thlir ho niin, CLSS housing loan diltute chungchang pawh ngaihtuah ho nghal a ni.
Beneficiary Led Construction (in sak tanpuina) dawng thei tur hian India khua leh tui dik tak, tuna an chenna khuaa January ni 1, 2014 hma lam kum nga tal lo cheng tawh, kum khata Rs nuai 3 la lut tling lo, in sakna tur ram leh a lehkha nei ngei, mahni puala chenna in la nei lo emaw chenna in awngrawp tawh tak mahnia sa tha thei si lo emaw nih a ngai a. Programme dang hnuaia in sak tanpuina dawng tawhte chuan an dawng nawn thei lo vang a. Hmeithai te, pianphunga rualbanlo awmna chhungkua te leh kum upa te chu duhsak bik an ni bawk ang.
Credit Linked Subsidy Scheme (CLSS) loan hi kum khata Rs nuai 6 aia tlem la lut chinin an dilin, an dawng thei ang a. Rs nuai 6 thleng lakin, a pung (interest) subsidy 6.5% chu sawrkar laipui tum tur a ni a; Rs nuai 6 chung lam lak chuan, nuai 6 a chuanna chin zawng pung chu a latuin a rulh vek tur a ni thung. He housing loan hi in thar sak nan emaw, in zauh nan emaw, in sak belh nan emaw hman theih a ni.
