Mizoram Tourism chuan Anthurium Festival 2016 chu Reiek Tourist Resort ah Ni 22 - 24 September, 2016 chhung in a buatsaih leh dawn a. Hun hlimawm leh nuam tak mipui ten kan hman theih nan Tourism Department chuan theihtawp a chhuah a ni. Zo-Anthurium Growers Society chuan Anthurium an tharchhuah chi hrang hrang hmangin varietal display an buatsaih dawn a ni. Ei leh in tuihnai tak tak eitur awmin, Mizoram KVI chuan an thilsiam chhuah chi hrang hrang lei theih turin an phochhuak bawk ang. Zotlang Br. YMA buatsaihin intihhlimna atan Carnival siam a ni dawn bawk. Photo Booth awmin hetah hian a duh a piang tan milar tak tak te thlalakpui tur a awm bakah, kan hnam incheina famkim nen a thla la duh tan englai pawhin thla a lak theih dawn a ni.

Reiek khua chuan anmahni thlai thar chi hrang hrang tharlam tak tak te an zuar chhuak bawk ang. Evergreen Tours & Travels buatsaihin Wall climbing Competition hlimawm tak buatsaih a ni dawn bawk. Go Mizoram buatsaihin Adventure Park puitham tak siam a ni ang a, hetah hian Tree House, Ziplinning, Sky Skateboarding etc. leh a duh tan puan in a riah nghal theihna siam a ni ang. Mizoram Rifle Association chuan Rifle Shooting Competition leh target shooting a buatsaih dawn bawk a ni. MUP buatsaihin Mizo Sairawkherh inperh siak a awm bawk ang. He Festival hlawhtlinna atan Department hrang hrangin hlawk taka tha thawhin, mipuite tana pan nuam turin kawng pawh PWD lamin nasa takin siamthat hna an thawk a ni.He hun hlimawm tak hi rawn chhim vek turin Mizoram Tourism chuan mi zawng zawng a sawm tak meuh a ni.