Pu Lal Thanzara, Health & Family Welfare Minister hovin tukin khan India ram khawpui hrang hranga Alzheimer’s Day puala Memory Walk an buatsaih chu zawm vein, Millenium Centre atanga Vanapa Hall thleng Memory Walk neih a ni. WHO chuan 1994 khan September 21 hi World Alzheimer’s Day ah a puang a, he ni denchhen hian Alzheimer’s & Related Disorders Society of India (ARDSI) Mizoram Chapter pawhin tukin zing dar 6:30 khan Memory Walk hi an buatsaih a. He walk buatsaih anih nachhan chu kan laina, kan thian, kan thenawm, kan thawhpui Alzheimer vanga hriatna hlauh mek te leh harsatna hrang hrang tawk mek te, boral tawhte tiamin kan awm a ni tih leh midangten an lo hriat ve theih nan a ni.

Pu Lal Thanzara chuan, Alzheimer's Disease leh a anpui natna tuartute a tuarpuizia sawiin, thlahthlam lova tawiawm zel turin pungkhawmte leh Mizoram mipuite thu a chah in, he thluak natna hi kan hriatchian zela he natna vei avanga rilru mangna tuarte leh an chhung te hriat thiam pui zel turin a chah a. Heng natna tuartu te hmusit lova, Mizo ze mawi tak kan neih tlawmngaihna leh hmangaihna te a tuartute leh a enkawltute chungah lantir hi kan tih tur a ni, a ti a. Hriatna hlauh te tanpui turin theih tawp chhuah a, endawng mai lo turin a chah a. Alzheimer hi atna a ni lova, natna chi khat a ni tih hi kan hriatchian a pawimawh thu Minister hian a sawi bawk a ni.

Alzheimer and Related Disorders Society of India, Mizoram Chapter hian Alzheimer natna hriatchianna tura seminar te, natna veitu chhungkuate puala workshop te buatsaihin, social media hmangin, hetiang natna tawktu chhungkuate inpawh leh intanpui tawnna tur remchangte a siamsak a ni.

Memory Walk ah hian mi 500 chuang vel an tel a. A tel zinga upa ber Pu Thanghlira Kum 80 leh a naupang ber B. Zopuia Kum 1 1/2 te hnenah lawmman pek an ni a. Pawl aiawha kal tam ber Govt. Hrangbana College bakah, mi hrang hrang hnenah lawmman pek an ni bawk.