No.3374/2021-2022

Aizawl 13th December, 2021 : Vawiin khan Chhim veng YMA Hall, Mamit-ah District Industries Centre, Mamit bultumin Prime Minister Employment Generation Programme (PMEGP) Awareness Campaign hman a ni a. Dr. Lalrozama, IAS, District Bawrhsap, Mamit chuan khuallian niin he hun hi a hmanpui.

Khuallian chuan PMEGP Awareness Campaign Programme-a tel te chungah lawmthu sawiin eng thil pawh ti dawn ila, tum mumal tak kan neih a pawimawh thu a sawi a. Mahni inringtawk tak leh tumruh takin midang ngaihdan lak chin tawk hria a, mi pakhat nih tum turin kalkhawmte a fuih.

PMEGP hi Mizoram pumpuiah kalpui niin, District hrang hrang leh Bank hrang hrangte'n an puitlin tur Target State Level Consultative Committee-in a rawn a pe thin a. Aspirational District kan nih angin kum hmasa lamah duhsak bik kan nih thu tarlan niin diltu an tam loh thin avang leh a dil zingah pawh Bank lam atanga pek tlak loh an awm thin avangin kan target kan phak lo hle a, kumin bikah hian ruahman chhinna ang chuan a tlem berah Mi 51 (DIC -22 + MKVIB -29) hnena pekchhuah tur niin Sawrkar tanpuina hi Rs 159.13 lakh sem chhuah tura beisei a ni. Bank 9 zingah Bank 5 chauhin dilna an dawng bawk. PMEGP Loan hi dil nachang hrelo leh dil thiam lo tam tak kan la awm avanga he Programme hi buatsaih a nih thu tarlan a ni.

PMEGP Loan hi India khua leh tui dik tak, Kum 18 tling chin tan dil theih a ni a. Education Qualification nei lo tan cheng Nuai 10 thleng dil theih niin Pawl 8 pass chin tan cheng Nuai 10 chin chunglam thlenga dil theih a ni. Loan hi 35% chu Sawrkarin a rulhsak tur niin Manufacturing Sector-ah Nuai 25 thleng leh Service Sector-ah cheng Nuai 10 thlenga dil theih niin nakum March thla ral hma thlengin dilna thehluh theih a ni dawn a. Hrechiang duh tan www.kviconline.gov.in/pmegpeportal) leh Office hun chhungin zawhfiah theih a ni.

Vawiin PMEGP Awareness Campaign Programme hi Pu Lalbiakzuala Aineh, General Manager, DIC Mamit chuan kaihruaiin Pi PC Lallawmkimi, LDM Mamit District chuan PMEGP Bank loan (processing/sanction/repayment) chungchangah zirtirna a pe a. Pu Joseph Hmingdailova, LDC, DIC Mamit chuan PMEGP loan dilna form fillup dan bakah score card chungchangah kalkhawmte zirtirna a pe bawk.

He hunah hian PMEGP Loan hlawhtlinpui tawhte atanga thusawi ngaihthlak a ni bawk.