2429/2025-2026

Dated Hnahthial, the 28th November, 2025: Pradhan Mantri Employment Generation Programme (PMEGP) Scheme tan District Level Monitoring Committee chu thukhawmin Bawrhsap, Pi K. Vanlalruati'n a kaihruai a. KVIC, DCIO leh Bank lama thawktute bakah VC hruaitute chu thuthawmnaah hian telin Hnahthial District-ah PMEGP Scheme hnuaia loan la an tlem nachhan te sawi hovin mi tam zawkin loan an hman tangkai theih dan tur sawi ho a ni.

Hnahthial Bawrhsap chuan DCIO leh VC te chu mipuite hnenah loan lak a hlauhawmloh thu hrilhhre tura a duh thu sawiin he PMEGP hnuaiah phei chuan 35% subsidy a awm avangin loan pangngai angiin a that lehzual thu a sawi a. Chuvang chuan a tam thei ang berin dinchhuah nana an hman theihna turin lo inhrilhhre thin turin a chah a ni. Chutih rual chuan subsidy dawng tur chuan loan hi a dilna ang taka an hman a tul thu mipuite hrilh chiang thin turin a chah bawk. 

Khadi and Village Industries Commission (KVIC) Executive, Pu Safiyan Hayath leh Pu Nilimesh Sarkar te chuan Hnahthial District chu District dang nen khaikhinin PMEGP hnuaiah loan la an tlem thu sawiin Sawrkar chuan he Credit Linked Subsidy duan chhan tak, mi rethei dinchhuah tumte hnenah thleng ngei se a tih thu an sawi a. Chumi thleng tur chuan District lamah loan hi la tam se an duh thu sawiin trade thlan kawngah pawh mipuite chu puih an ngaih tur thu an sawi a ni.

Tun dinhmunah chuan target atangin achievement rate chu 6.99% chiah a la nih thu sawiin Mizo mipuiten an thlan hnem ber pawl, vawk vulh chu tunlai ASF hri leng vang hian bank tan pawh loan pek a harsat thu leh trade dang Hnahthial District tan pawha tangkai thei tur thlan thiam a pawimawh thu an sawi  bawk.