Nimin 28th March, 2016 khan Agriculture Conference Hall-ah Pradhan Mantri Fasal Bima Yojana (PMFBY) chungchangah Dr. C. Lalzarliana, Director of Agriculture hovin sensitization programme hman a ni.

He scheme hi Department of Agriculture, Co-operation & Farmers Welfare, Govt. of India hnuai a mi niin kum 2016 Kharif Season atanga hman tan tur a ruahman a ni.

Crop Insurance hi tun hmain National Agricultural Insurance Scheme (NAIS) tih leh Modified Agricultural Insurance Scheme (MNAIS) tih hmingpuin hmalak a lo ni tawh thin a. India ram pumah ah District 50-ah kalpui tawh a ni a, Mizoramah pawh Serchhip District -ah tlang lo Buh, Leilet leh Field Pea te Insure tawh niin chhungkaw 571 hnenah Insurance claimed Rs. 53,39,614.00 pawh pek chhuah a lo ni tawh.

He Scheme Pradhan Mantri Fasal Bima Yojana hi kum hmasa lama National Agril. Insurance Scheme thlakna tura Central Cabinet in ni 13.1.2016 a a lo pawmpui tawh kha niin Loneitute pawhin an thlai tharah harsatna an tawh pawha chhanchhuahna tura ruahman a ni.

Agriculture Director Dr. C. Lalzarliana chuan Crop Insurance hian hriat lar a hlawh lutuk loh laiin a pawimawhna erawh loneituten an hriat a tul hle. Tui lian, khawkheng leh chhiatna hrang hrang avangin Buh leh thlaiin a tuar thei a, chung hun a lo thlen a kuthnathawk tuten hamthatna an hmuh ngei theih nan Insurance tih hi a pawimawh a ni a ti. A sawi zel naah Director chuan Scheme thar kalpui tur a nih reng reng in Officer ten chiang taka an hriat a pawimawh thu sawiin chu chuan hnathawh pawh a tiawlsam bik a ni tiin Officer kalkhawmte theih tawp chhuah turin a chah nghal bawk.

He Scheme ah hian Loneituten premium an pek ve dan tur ah Kharif Food & Oilseed Crops ah 2 % niin Rabi Food & Oilseeds Crops ah chuan 1.5 % a ni thung a, Commercial Crops-ah 5% premium pek a ngai thung.

He hunah hian Shri K.C. Behera, Regional Manager, Agricultural Insurance Company Ltd, Regional Office, Guwahati chuan zirtirna pe in Agriculture Department-a Officers leh KVK hrang hrang atangin Senior Scientist & Head te bakah ATMA atangin Director SAMETI leh Project Director te an tel a, sawihona hun tha tak neiin an hlawkpui hle.