Nimin khan State Bank of India, Champhai Branch te chuan Champhai District Hospital a dah turin Wheel Chair leh Stretcher panga ve ve an hlan. He hunah hian Champhai DC Pu Vanlalngaihsaka chu khuallian niin, Wheel Chair leh Stretcher-te hi CMO Dr. C Zirliana hnenah hlan a ni a. Dr. B. Lalramchhuanga'n hun hi a kaihruai a ni.

Champhai DC chuan thusawiin SBI in an hlep 2% atanga midangte tanpuina hmun hrang hranga an sem thin chu lawmawm a tih thu leh Champhai District Hospital-in a mamawh tak an hlan thei chu fakawm a tih thu a tarlang a. SBI Champhai Branch te hmalakna chu hriatreng tlak nih thu a sawi bawk.

Dr. C Zirliana, CMO pawhin thusawiin damlo leh miharsa ten tangkai taka an hman tur tanpuina an hlan chu lawmthu a sawi a, an hlep atanga tanpuina an sem thin chu midang tana malsawmna ni tura chhunzawm zel turin a chah bawk.

He hunah hian SBI Champhai Branch manager hnen atangin thusawi ngaihthlak niin SP Sharma, Chief Manager Lead Bank-in lawmthu sawiina hunin a khar a ni.

SBI hian CSR thupui, SBI dinnaah chuan mirethei leh chan chhe zawkte puih hi a thawh tur a ni, tih hmangin khawtlang rawngbawlna a kalpui thin a, kum 3 chhungin SBI in hlawkna a neih 2% chu CSR-ah hian alo hmang tawh a, nikumah cheng vaibelchhe 240 a ni a, CSR hnuaiah hian rethei tanpui te, zirna chawikan te, environment humhalh te, fahrah chenna din te bakah khawtlang tih hmasawnna kawng hrang hrang thawh thin a ni a. Mizoramah chuan CSR hnuaiah hian School mamawh pek thin anih bakah fahrah enkawlna mamawh tum sak te thawh thin a ni a, nikum khan Aizawl leh Lunglei damdawi Inah Ambulance 2 an lo pe tawh a ni.