4343/2023-2024

Khawzawl, 26th March 2024: March ni 24, 2024 (Pathianni) a Khawzawl Biate PMGSY Road kawng siam tha lo nia sawi video darh chungchang chu nimin (25.04.2024) khan Contractor leh Chawngtlai All NGO CC ten an sawi ho a. PWD Khawzawl Division EE leh Staff ten a hmunah enin Contractor te siam tha leh turin an hriattir a. Contractor lam pawhinn kawng siam that hna hi an thawk chhunzawm nghal a ni.

Khawzawl – Biate Road hi Km 60 a thui a ni a. A siam hna hi hmun sawm (Group A- Group J) a then sawm niin Contractor Pakhat in Km 6 zel kawng siam that hna hi an thawk a. He kawng hi Project Division IV, PWD, Aizawl ten a tirah an enkawl a, June ni 5, 2023 atang khan PWD, Khawzawl Division kutah hlan leh chauh niin March 31.03.2024 a zawh fel hman tura ruahman a ni.

He kawng siam tha lo ni a sawi hi Group B (6.00-12.00 kmp) huam chhunga awm niin Contractor chu Pu P. Lalbiaka, Luangmual a ni a. Black Topping that tawk lohna lai hmun hi ram neituten khawih an phal loh avangin laih loha dah reng a ni a, Contractor ten Blacktopping an khawih laiin khaw mipui ten an ngenna angin a theih chin chinah kawng laih zauh hna hi thawh leh a ni a, Ni 22.3.2024 (Zirtawpni) khan mipui te ngenna angin Blacktopping hna hi thawhleh nghal a ni. Hna thawh anih lai hian a hmunah Chawngtlai khawtlang hruaitute pawh an awm ve nghe nghe a. A tha tawk lo a ni tih hriat chhuah nghal a ni a, Contractor leh Khawtlang hruaitute inbe remin siam that leh tura ruahman nghal a ni.

PWD Khawzawl Division EE, Pi Jenny Lalramchhuani chuan he thil thleng hi pawi a tih thu sawiin , blacktopping hnathawh a nih chuan thil thleng palh ve fo thei a ni, a ti a. Kawng tha lo chu siam that leh a nih tur thu a sawi bawk. Contrator ten hna an thawk tha tawk lo a nih chuan Payment a pek dawn loh thu a sawi bawk a ni.