DIRECTORATE OF INFORMATION & PUBLIC RELATIONS, Government of Mizoram, India

4342/2023-2024

Champhai, the 26th March, 2024: Thlangtlak Mual Committee leh Chapchar Kût Organizing Committee, Vaphai te tangkawp buatsaihin vawiin khan Thlangtlak Mual, Vaphaiah Chapchar Kût lawm a ni. He hunah hian District Bawrhsap Pu James Lalrinchhana chu Kût Pa niin, Central YMA Fin. Secretary Pu MS Ralte chu Kût Thlengtu a ni.

Kût Pa Pu James Lalrinchhana chuan Chapchar Kût lawm tura Vaphai khawtlang inpuahchahna fakawm tiin kalkhawmte Kût pual chibai a buk a. Pipu te'n hlawhtlinna chang turin rim taka hna an thawh thin thu leh Kût lawm tura theihtawp chhuaha an inpuahchah thin thu sawiin, Kût lawm tura kalkhawmte chu hlawhtlinna chang turin an hmazawn theuhah theihtawp chhuah turin a sawm a. Pipu te'n Kût ni-ah inhauh leh inrem lova awm an duh loh thu sawiin, Chapchar Kût puala inremna siam tum theuh turin Kût hmangtute a sawm a, hei hi Kût denchhena hlawkna kan neih theih tur a ni, a ti a. Zonun zemawi chhawmnun zel tlak, Chapchar Kût a lantir thin chu "Sem sem dam dam, ei bil thi thi' tih a nih thu leh he hun hi midang tana malsawmna ni tura thil neihte phal taka inpekna hun atana hman a nih thu a sawi a. Chapchar Kût chu tanpui ngaite tanpuina leh thil neih angte phal taka midangte pekna hun atana hman zel ni se a duh thu sawiin, Kût chuan khawtlangah malsawmna a thlen ngei a beisei thu a sawi bawk.

District Bawrhsap Pu James Lalrinchhana chuan Champhai District chu pipu sulhnu tam tak awmna, sik leh sa nuam, ramri dep district mawi tak a nih thu sawiin, khualhip kawngah theihna sang tak a neih avangin khualtha tam zawk kan la hip thei dawn a, hengte kaltlang hian sum leh pai tam zawk kan lalut thei dawn a ni, a ti a. Swadesh Darshan 2.0 hnuaiah Champhai District hmun dangte zingah Vaphai leh Chawngtui East te chu hmalakna tur Master Plan Iteration 1 Under Swadesh Darshan 2.0 Champhai Destination hnuaiah dah a nih thu tarlangin, Iteration 2 atan Thlangtlak Mual, Vaphai chu project hmalakna turin Distric Level Committee-in a pawmpui tawh thu a sawi a. District mipuite chu khualchhawn thiam zir tur leh mamawh angte lo inhmakhua lawk thiam turin a chah a. Zirna kawnga tanlak, ruihhlo do leh ramngaw leh nungcha humhalh kawngah theihtawp chhuah a tul thu sawiin, hei hi tourism chawilar nana pawimawh tak a ni, a ti a. Kalkhawmte chu rualawhna dik nei turin a chah a, Kût hun nuam leh hlimawm tak hmang vek turin duhsakna a hlan nghal bawk.

Kût Thlengtu Central YMA Fin. Secretary Pu MS Ralte hnama min siamtu Pathianin chenna hmun nuam tak leh Kût tha tak min pek thu sawiin, heng kan kût neihte hi kan hluta kan chawilar thiam a tul hle a ni, a ti a. Uar lehzuala Kût neihte kan chawilar a pawimawh thu leh hnam ziarang leh nunphungte humhalha pholan tam deuh deuh a tul thu a sawi a. Vaphai leh a chhehvela pipu sulhnu awmte chu ngaihlu tur leh neitu thinlung pua enkawl zel turin a chah a. Khawvel mit hmuha ropui ni turin mahni hnam thuam, hnam ziarang leh nunphungte zahpui lova pholan tam a tul thu sawiin, kalkhawmte chu Mizo nihna ngaihlua zahpui lo turin a chah a, mahni puala hnam thuam neih tum theuh turin a sawm bawk.

He hun hi Pu C. Zakanglova, Chairman, Chapchar Kût Organizing Committee chuan kaihruaiin Pastor Lalhmunmawia Pachuau in hunserh a hmang a. Pu MC Lalramenga, Vice Chairman, Thlangtlak Mual Committee-in inlawmna thu sawiin report a pe a. District Librarian Pu Zothanglawra'n Kût pual thuchah sawiin, Art & Culture Department aiawhin Branch MHIP leh YMA hnenah hnam thuam a hlan a. Pu Thangngaihzuala, VCP Vaphai, Pu JH Lalkrosthanga, VCP Chawngtui East, Vaphai Insuihkhawm Pawl, Aizawl leh Champhai hotute hnen atangin thusawi ngaihthlak a ni a. He hunah hian hnam lam mawi tak takte entir niin, zai leh rimawi benglut tak takte ngaihthlak a ni bawk.

Chapchar Kût lawmna hun hman zawh hnu hian District Bawrhsap chuan Thlangtlak Mual Committee-te hmalakna a tlawh nghal bawk.

Attachment