Agricultural Technology Management Agency (ATMA) Champhai District bultumin vawiin chawhma khan Pradhan Mantri Krishi Sinchai Yojana (PMKSY) chungchangah Progressive Farmers thlanchhuah te nen inzirtirna leh sawihona hun I&PR Conference Hall-ah buatsaih a ni.

He hunah hian Champhai Addl. DC Pu C. Lalzarliana chu khuallian niin, kan ram hian hmasawnna ah a riltam in a tuihal a. Hmasawnna kawng dik leh tlo nei tur chuan thawhhona leh intawiawm tawnna tha tak neih a pawimawh a; Kan kuthnathawktute pawhin mahni ngaih dan a kal mai lovin mithiam ten kawng tha zawk leh hlawk zawk an kawhhmuh te chu ngaihvenin tunlai thiamna hman tangkai thiam zel hi a pawimawh a tih thu a sawi a ni.

Hun kaihruaitu Pu RK Nithanga, DAO, Champhai chuan PMKSY thil tum te sawifiahin, agriculture leh a kaihhnawih hmalakna tam tak hi tui mamawh tawk a awm leh awmloh a hlawhtlinna innghat a nih vangin tui pek dan kalphung irrigation system tha tak siam tura scheme dangte leh Department hrang hrang hmalakna te ne thlunzawma kalpui a nih thu a sawi a ni.

Vawiin Farmer-Scientist Interaction hunah hian Pu CC. Lalchuangkima, Project Director, DRDA chuan Watershed Development chungchangah thu a sawi a. Pu Vanlalpekhlua, SDO (Minor Irrigation) chuan Command Area Development chungchangah thu sawi bawkin, Pu Zonunsanga, SDEO, Horticulture Department chuan On Farm Water Management chungchangah zirtirna a pe a. Kuthnathawktute hian an hmalakna te leh mamawh leh harsatna an tawhte tarlangin, sawihona hun hman chhunzawm a ni.

PMKSY hi nikum 2015 khan kalpui tan niin, kum nga chhunga hman turin Rs. 50,000 crore dah a ni a. Lo leh leilet chawm tura tui lakna thar siam bakah a awm sa tangkai leh hlawk zawka drip, sprinkler, rain-gun irrigation leh kawng dang hmanga kalpui dan ngaihtuah te he scheme hnuaiah hian a tel a ni. Ministry of Agriculture in India State hrang hrang khaikhinna (2011-2012 data) a neih atanga a lan danin, Mizoramah hian buh leh thlai leh thei atana ram hman chin, net sown area chu 97,000 hectare niin, heng zingah hian 13% chauh irrigation in a huam a, a bak 84,390 hectare chu ruahtui lawnga chawm a ni.