Thawhlehni tlai khan Industries Minister Pu H. Rohluna leh Parliamentary Secretary Pu Joseph Lalhimpuia-te chuan Luangmual a Industrial Growth Apparel & Garment Manufacturing Centre sak lai mek chu a hmunah an enfiah.

Pu H. Rohluna chuan Union Minister of State for Textiles Pu Santosh Kumar Gangwar leh Chief Minister Pu Lal Thanhawla te tanpuina avanga thalaiten eizawnna ngialnghet zawk an neih theih nana Apparel & Garment Manufacturing Centre kan nei thei hi lawmawm a tih thu a sawi a. Chutih rual erawh chuan Civil Construction work lama hma lak danah duhthu a sam loh thu leh siamthat ngaite atul anga siamthat vat a tul thu a sawi bawk.

Pu Joseph Lalhimpuia pawhin tun dinhmuna Quality of work siamthat a nih loh chuan State sawrkar tan enkawl a harsat a rinthu leh hmalakna tul te chak zawk a bawhzui a tul thu a sawi bawk a ni.

He Apparel & Garment Manufacturing hmun Industrial Growth Centre sakna scheme hi State Sorkar in mawhphurhna la lovin Central sawrkarin direct-in a enkawl a , hman theih tura sak zawh anih veleh state sorkar kutah a awm dawn a ni. He hmunah hian training-na tur building pathum a awm a, building 1-naah hian mi 105 leh khawl 105 a awm thei a, building 2-naah hian mi 95 leh khawl 95 a awm thei bawk a, building 3-naah hian mi 105 leh khawl 105 a awm thei dawn a ni. Heng khawl te hi Japan siam niin helai atang hian thuamhnaw chi hrang hrang leh design hrang hrang a siam theih tawh dawn a ni.

He hmun hi Central sawkar in Industries lama hmasawnna tura a ruahman a ni a, nikum March, 2015 khan Union Minister of State for Textiles in a lungphum hi phum tawhin, a building sak hna hi thawh tan nghal a ni. Sak zawh hunah Prime Minister hawn tura ruahmanna siam a ni bawk. Building leh Training Centre-te ruahman a buatsaih fel a nih hnuah Implementing Agency kutah sawrkarin a dah dawn a ni.

Industries Department Commissioner Pu Zothan Khuma bakah sawrkar aiawhte engemaw zat an tel bawk a ni.