No.6309/2020-2021

Vawiin zing dar 7:00 khan District Headquarters leh Battalion Headquarters-ah te police thi te sunna leh zahna lantirna Commemoration Parade neih a ni a. Mizorama Police Commemoration Day hmanna pui ber Aizawl-ah chuan Mizoram Police, duty laia hmelma kut tuara thi tawhte hriatrengna ‘Martar Thlan’ 1st Bn. MAP Headquarters, Armed Veng-a siamah DGP leh police officers ten hun an hmang a. India ram hmun hrang hranga Police, ni 1.9.2019 atanga ni 31.8.2020 chhunga duty laia nunna chan mi 265 te hming chhiar chhuakin urhsun taka Police thi te sunna leh zahna pangpar hlanna neih a ni. Kumin chhung hian vanneihthlak takin Mizoram Police zingah duty laia thi an awmlo a ni.

Ram puma Police Commemoration Day hmanna pui ber chu National Police Memorial, Chanakyapuri, New Delhi-ah October 21, 2020 8:00AM ah neih a ni a, Hon'ble Union Home Minister-in a hmanpui a. Hetah hian BSF kaihhruaiin Joint Police Parade neih a ni a, Mizoram Police aiawhin Flag Bearers- H/C C.Lalsangmawia leh C/359 Malsawmkima, Aizawl DEF te an tel.

October 21 hi India ram pum ah Police Commemoration Day atana hman thin a ni a. India ramchhhunga awm Aksai Chin pela ralthuam famkim nena rawn lut ru China sipai rualte chuan mahni ram venghim tura hnathawk (duty) mek India Police te chu Hot Springs (Ladakh) ah October 21, 1959 ah an lambun a, Police huaisen tak tak sawm (10) lai maiin nunna hlu tak an chan phah a ni. He ni hi Police, ram tana nun pete hriatrengna "Commemoration Day" atan India Sorkar chuan puangin ram pumpuiah kum tin hman turin a rel a ni. Hemi ni zing dar 8-ah hian India ram State Capital-ah leh District Headquarters-ah te Commemoration Day Parade neih a ni thin a, India ram puma Police duty laia thi te hming chhiarchhuakin anmahni hriatrengna leh sunna urhsun taka hman a ni thin.