India rampumah vawiin hi police ram tana nunna hlantu, Police thite hriatrengna ‘Commemoration Day’ ni a hman a ni a, Mizoramah pawh Aizawl leh district hqrs ah te he Commemoration Day Parade hi hman a ni.
A hmanna pui ber Aizawlah chuan tukin khan 1st Bn.MAP Headquarters Martar Thlan, Armed Vengah Mizoram Director General of Police hovin Commemoration Parade Day hi hman a ni a. Ni 1.9.2015 atanga ni 31.8.2016 chhunga India ram Police mi 473 duty laia nunna chante hming chhiarchhuakin urhsun taka police thi te sunna neih a ni. Vanneihthlak takin hemi hun chhung hian Mizoram police thi an awmlo a ni.
Hemi hnu hian Mizoram Police duty laia hmelma kut tuara thi ta te hriatrengna leh zahna pangpar Martar thlanah hian DGP leh Police Officer ten an dah a ni.
Police Commemoration Day hi ni 21 October 1959 ah Ladakh a Police Post China sipai ten rawn la in, police duty lai mi 9 (pakua) an kahhlum a, police ram tana nunna hlantute hriatrengna’n “Commemoration Day’ ah India sorkar chuan rampumah kumtin hman turin alo rel ta a ni.
