Vawiin khan DIG(Northern Range) leh DIG(Eastern Range) huam chhunga District SP te, SP Traffic te leh SDPO ten G.S.Arya Mess, Police Headquarters ah Pu Lalbiakthanga Khiangte IPS, DIG(NR) leh Pu Lalhuliana Fanai IPS, DIG(ER) te hovin Crime Review leh Law & Order chungchang sawi hona meeting an nei a. Kum 2018 January atanga October 2018 leh January 2019 atanga October 2019 chhunga crime dinhmun an thlir ho.

DIG(NR) huam chhungah hian Aizawl District, Mamit District leh Kolasib District te awmin January 2018 - October 2018 chhungin IPC leh Non-IPC hmanga thubuai(case) ziah luh zat chu 1318 a nih laiin January 2019 - October 2019 a thubuai ziah luh zat chu 1762 a ni a. Kum hmasa aiin thubuai ziah luh hi 444 a tam belhin a tamna hi za zelah 33.68% a ni.

DIG(ER) hian Champhai District, Serchhip District, Khawzawl District leh Saitual District te a huam a. IPC leh Non-IPC hmanga thubuai ziah luh zat chu January 2018 - October 2018 khan 407 niin January 2019 - October 2019 ah erawh chuan 290 ah a tla hniam ve thung a. Kum hmasa aiin 117 in thubuai ziah luh a tlem a, a tlemna hi za zelah 28.75% a ni.

He meeting ah hian DIG(NR) Pu Lalbiakthanga Khiangte chuan thalaite zinga Zu leh Ruihhlo chi hrang hrang hmansual lo hluar chho zel leh Mizoram chu ruihhlo tawlh rukna kalkawng a nih avanga ramin a tuar nasat dan te sawiin ruihhlo dona kawngah Police leh Excise ten theihtawp an chhuah reng chunga tihrem a harsa hle tih a sawi a. Hemi kawngah hian Police leh Excise ten ruihhlo do kawnga hma latu dang YMA, VDP leh pawl dangte nen thawk hova, theihtawp chhuah chhunzawm a pawimawh tih sawiin SP tinte chu mahni District huam chhungah tha thlah lova tlawmngai pawl te nen theihtawp chhuah zui zel turin a chah a ni.

Vawiin a Crime Review leh Law & Order meeting ah hian tun hnaia Myanmar Rakhine State atanga lo kal Rohingya mite leh Nepal atanga Gorkhali te, mihring hmanga sumdawngtu te kut ata chhanchhuah an nih chungchang pawh sawi a ni a. Ramin hma a sawn ruala sualna lo pung zelah tun hma lama Mizoramin a la tawn ngai loh mihring rukbo leh sumdawn nana hman(Human trafficking)laka mipuite kan him theih nan fimkhur tura inzirtirna, neih a pawimawh zia sawi a ni a. Social Media kal tlanga thu post chungchangah mipui vantlang ti ralkhel zawnga thu belhchian dawllo, naupang rukbo, silai tawlh ruk tih te post ching an awm thin chu thil ngaihmawh awm tak a nih avangin District tina SP te chu social media a vantlang ti ralkhel zawnga thu belhchian dawllo post a bo theih nan hma la zel turin an inchah a ni.