Nihnih awh tur India hmarchhak a damlo zai thin daktawr inzawmkhawm pawl khawmpui vawi hnihna “2nd Annual Conference of North East Chapter of Association of Surgeons of India” (2nd NECASICON 2019) chu Aijal Club-a MC Cabe Hall ah vawiin  khan tan a ni a, Health & Family Welfare Minister Dr. R. Lalthangliana’n khuallian niin a hmanpui a, khualzahawm atan Dr. Arvind Kumar, President, Association of Surgeons of India (ASI) hman a ni.

He hun hmanpuitu khuallian Dr. R. Lalthangliana chuan Health Minister reilote chauh a la ni chungin daktawrte hnen atang thil tam tak a zirchhuah tawh thu a sawi a, mihring hriselna hi sawrkar pawhin a ngaihpawimawh berte zing ami a nih avangin kawng hrang hrangin hmalak a nih bakah ruahmanna chi hrang hrang siam mek zel a ni a ti a, hetih lai hian daktawr, a bikin damlo zaitu surgeon indaihlohna Mizoramah a nasa em em mai a, tunah hian surgeon 27 chauh Muizoramin a nei a, India ram state hrang hrang zingah surgeon nei tlem ber kan nih hial a rinawm a ni a ti a, India ramah pawh a bikin hmarchhak state te hi hriselna lamah leh a enkawlna kawngah kan la hnufum bik em em a ni tih sawiin, heng harsatna sukiang tur hian sawrkar laipuia health minister pawh vawi duailo a sawipui tawh thu leh India hmarchhak state hrang hrang health minister te pawh a kawm thin thu sawiin a huhova tang tlanga hma lak anih theih nan ruahmanna siam tum a nih thu a sawi bawk. Pu Thangtea chuan heng harsatna hrang hrang kan tawh mek karah hian damlote tana in pe zo tak leh hmasawn tum tlat daktawr rual intelkhawm an awm chu a thlamuanthlak hle a ni tiin, an thiamna leh finna midangte tan malsawmna leh damna a nih zel theih nan duhsakna a hlan a ni.

Khualzahawm atan Dr. Arvind Kumar, President, Association of Surgeons of India (ASI) chu rokhawlhna a awm thut avanga Aizawl a lo kal theilo chungin skype live feed kaltlangin a thusawi ngaihthlak a ni a, surgeon te mawhphurhna leh ASI thil tum chi hrang hrangte a sawifiah bakah fuihna thu tha tak tak a sawi a, India hmarchhakah pumpui, chaw kawng leh chuap cancer a tam bik thu a sawi a, hei hi theihtawpchhuah a an beih mek rualin heng natna laka inven dan hi uar nasa lehzuala inzirtir a tul tih a sawi a ni.

North East Chapter of Association of Surgeons of India hi June ni 30, 2018 khan din a ni a, India hmarchhak state panga Arunachal Pradesh, Meghalaya, Mizoram, Nagaland leh Sikkim an tel a, tun dinhmunah member 172 awmin an zinga 104 hi life member an ni. Association of Surgeons of India (ASI) hnuaiah September ni 1, 2018 khan chapter hrang anga pawm an ni a. September 8&9, 2018 khan khawmpui hmasa ber 1st NECASICON 2018 chu Shillong, Meghalaya ah neih niin, a vawihnihna “2nd NECASICON 2019, November 22&23” hi Association of Surgeons of Mizoram-in an thleng ve thung a ni.

2nd NECASICON 2019 neih a nih chhung hian daktawr thiam bik thlanchhuah ten damlo enkawl chungchang leh a kaihhnawih thupui hrang hrang insemin thu an sawi dawn a ni.