Rikrum leh buaina hrang hrang chhuah palh nikhua a media te nena inlaichinna tha tak siam dan tur chungchangah Mizoram Police hotu lian te tan training nithum awh tur buatsaih chu vawiin chawhma khan I&PR Conference Hall-ah tan a ni a. Training hi DGP Pu Lalrokhuma Pachuau chuan a hawng a ni.
DIG (Training) Pu Zorammawia kaihhruaiah hian DGP Pu Lalrokhuma chuan he training buatsaihpuitu Indian Institute of Mass Communications (IIMC) chungah lawmthu a sawi a. Tunlai khawvela media in mipui mimir a nghawng nasat lai leh dan leh thupek kengkawhtute a bikin Police hotute nena inkungkaihna tha tak neih a tulzia te a sawi a. Mihring te dan rual loh rikrum leh chhiatrupna hrang hrang lirnghing, tuilian, leimin bakah mihring te atanga chhuak thei chi leh chi inkar buaina te, zirlai leh pawl hrang hrang atanga nawrhna buatsaih ang chi ah te hian Police Officer ten tihtur leh tihloh tur chin an thliar thiam a tul takzet a ni, a ti. Thu kal lam leh haw lam veh reng tu media te hnenah puanzar theih chin pek chhuah thiam pawh tunlai khawvelin a mamawh langsar tak a nih tawh avangin media lam te pawhin thuthar umzui chin tawk nei thiam se a duh thu a sawi lang a ni.
Vawiinah hian IIMC Proffessor Senior ber KM Srivastava chuan Training buatsaih dan tarlangin rampumah Police hmun hrang hrangah an buatsaih thin thu leh tun tum hi an vawi 22-na a nih thu a sawi a. Media te chu zalenna thui tak nei, a bik taka kaihhruai leh enkawl (manage) chi an ni lo, a ti.
Vawiinah hian Principal Adviser Pu TP Khaund leh Anti Corruption Bureau Director Karnal Singh te pawhin thu an sawi bawk.
Mizorama IIMC Special Officer leh Press Secretary to CM ni bawk Pu LR Sailo hmalakna avanga Mizoram Police Department leh IIMC New Delhi buatsaih he training hmanpui tur hian tawnhriat ngah tak tak Proffessor KM Srivastava, Gopal Mishra leh Arvind Uttam te an lokal a. Mizoram Police Officer thlanchhuah engemawzat bakah Assam Rifles, BSF leh CRP hotu thenkhat ten training hi an nei dawn a. Chanchinthar lakkhawm leh pekchhuah kawnga thil tul hrang hrang, tihtur leh tihloh tur te bakah tunhnaia rampum huap buaina lian tham thlen chungchang media report dan te zirin sawihona hun neih zel tur a ni.
