Vawiin khan Mizoram Police Sports Meet vawi 17-na chu Rajiv Gandhi Stadium Mualpuiah Home Minister Pu R.Lalzirliana’n a hawng.
Pu R.Lalzirliana chuan Mizoram police-te chu sawrkar innghahna, sawrkar mawi leh mawi loh tilangtu in ni, a ti. Dan leh thupek ken kawh kawngah an pawimawh em avangin sawrkar chuan police-te a duhsak hle tiin duty laia police thi te enkawl danah sawkarin a theih tawp a chhuah a, an kalsan tak an nupui leh fate hnenah an service hun chhung zawnga an dawn tur hlawh an lak bakah an pension kum a lo thlenin family pension pawh dan pangngai ang thlapa pek an ni, a ti a. Sawrkar hnathawk thar lak khap a nih lai pawhin duty laia police thi chhungte tan erawh LDC hnuai lam hna dahsak reng an ni, a ti bawk.
Home Minister chuan Director General of Police office sak mek a nih thu te, Central Police Workshop changtlung leh lian zawk sak a nih thu leh Tribal Girls Hostel, Mualpuia sak zawh tak chu Police hmeichhiate hman tangkai tur atana buatsaih a nih thu a sawi a. Mizoram Police Service Officer Association in sawrkar tanpuina beisei hauh lova an sum thawhkhawm atang liau liaua Guest House tha tak an sa chu an entawntlakin an chhuanawm hle a ni, a ti. Home Minister Pu R.Lalzirliana chuan police te chu civil mi aiin an taksa a hrisel zawkin an fit reng tur a ni, a ti a. Taksa insawizawi dan leh ei leh inah zirtirna dawng an nih avangin civil mi te aia dam rei tur a beisei an ni a, zu leh ruihtheih thil avanga police mi leh sa thi awm tawh lo se a duh thu a sawi bawk.
Kar khat awh tur Police Sports Meet hawnna inkhawmah hian DGP Thianghlima Pachuau chuan kalkhawmte lawmna leh fuihna thu a sawi a. Meet an neih chhung hian athletics, football, volleyball, lawn tennis, table tennis, badminton, taekwondo, judo, wrestling, tug of war, boxing bakah indoor games hrang hrang chinese checker, carrom leh chess te hmangin an inel dawn a ni.
