Tunhnaia Lunglei Civil Hospital atanga doctor 3 sawnchhuah chungchangah MZP Sub-Headquarters, Lunglei ten an lungawi lohna lantirin, kawngpui te danchah an ni a. Mipuite hriathiam zawk nan a hnuai ami ang hian sawrkar chuan hrilhfiahna a siam a ni –
- Dr. S. Thaizi hian promotion a hmuh avangin June ni 1, 2016 khan Lawngtlai District Hospital-ah sawn a ni.
- Dr. Lalremruata (Chest medicine) hi Aizawl District TB Centre (DTC), Falkawn-ah September ni 26, 2016 khan sawn a ni a. Aizawl District TB Centre hi District dang atang pawha damlo enkawl an ngah avangin full-time District TB Officer (DTO) ni turin sawn a ni. Falkawn Referral Hospital-a Multidrug-Resistant TB (MDR-TB) Ward a thiamna hmangin a enkawl pah thei dawn a ni.
- Dr. B. Lalhriatpuia (AYUSH) hi Bunghmun PHC-a AYUSH doctor an awm loh avangin September ni 30, 2016 khan Lunglei District vek, Bunghmun a sawn a ni a. A aiawh tur hian sawrkar chuan November ni 18, 2016 khan Dr. Shirley Lalbiakzuali Chhangte dah turin notification a chhuah tawh a ni.
November ni 18, 2016 vek hian sawrkar leh MZP aiawh te chu an in dawr a, an dinhmun an sawhsawn thu sawiin, doctor pathum aiah pahnih tal dah nise an ti a. Sawrkar pawhin doctor dang pakhat (diploma in child health), tuna Delhi-a awm mek chuan a in huam thu leh application pawh a thehluh thu an sawi a, December chawlkar hmasa berah a rawn zawm tur thu an tarlang a ni.
Heti chunga sawkar hmalakna hrethiam duhlo a MZP Sub-Headquarters ten, mipui tana harsatna siam zawng leh dan lova Total Bandh huaihawt an tum chu sawrkar chuan pawi a ti hle a ni.
