Meizial zuk sim a, vaihlo dona kawnga hma latu pawl pakhat, Tobacco Quitters of Mizoram (TQM) chuan an pawl din champha vawi 3-na chu vawiin khan Aizawl Press Club-ah an hmang a. Health Minister Pu Lal Thanzara Khuallian a ni.

Pu Lal Thanzara chuan Mizoram chu India hmarchhak state zingah meizial zuk khapna, vantlang punkhawmna hmuna dan bawhchhe tamna ber state a ni tiin meizial zu mi te hian anmahni hriselna an tih chhiat mai piah lamah a zu ve lo te tana harsatna thlentu an ni, a ti a. Vaihlo zuk leh hmuam in natna hrang hrang a thlen theih te sawiin chumi zinga hluar ber pakhat chu cancer natna a ni, a ti a. Hemi avanga damlo inenkawlna senso atan mimal leh sorkar in sum a seng hnem tak zet tih a sawi a. Vaihlo zuk leh hmuam ching ten an nghei hnua an taksa peng hrang hrangin a thatpui dan tarlangin zuk leh hmuam nghei tum te chuan an nghei tur lam aia an hlawkpuina tur lam ngaihtuah zawk se, a duh thu a sawi a. Mi tam zawkin vaihlo zuk leh hmuam an nghei zel theih nan sorkar leh pawl harng hrang hma lakna te chu mitinin tawiawm turin a ngen a ni.

TQM hi kum 2013 November 21 khan ding tanin Mizoram State Tobacco Control Society leh Indian Society of Tobacco & Health, Mizoram te nen tang tlangin vaihlo zial zuk leh hmuam do nan zirna in ah leh kohhran ah te awareness campaign leh quitters training te an buatsaih thin a. Vawiina an din champha vawi 3-na ah pawh hian an thawhpui pawl dang te nen hunhmangin TQM President Pu Saimawian hun a kaihruai a. Pu V.L.Bela, Vice President, ISTH(M) in thusawina hun a hmang bawk a ni.