Mizoram Police chuan mipuite kan him tlan zawk nan a hnuaia mi ang hian thuchhuah an siam.

Tunlai hian mi bum hmangten sum hlawm nei tarn tham deuh (High Net-Worth Individual) te bum a pawisa laksak nan a hnuaia inbum dan tarlan ang hian an che vel mek tih hriat a ni.

1. Thalai kum naupang lam leh nupui-pasal neilote bum an tum zual bik thin.

2. Social Media sites hrang hrang (Facebook, instagram, matrimonial websites etc) ah an bum duhte an thianah an siam phawt thin.

3. Inthianthatna/intih rinawmna turin thla 6 vel laite pawh inkawmna hlimawm lamin hun an hmanpui phawt thin.

4. Heng social media kaltlang hian an thian tharte Contact number leh details an dil thin.

5. Engemaw chen hnu hun remchang nia an hriat ve leh, dinhmun thalo leh laklawh taka ding mek leh pawisa nei lo (Airport Security paltlangna turin fee/tax pek ngai tur neilo ang te, dan kengkawh tute emaw hnena a thil tih sual vanga Excise/Custom/Fees etc pek ngai) anga insawiin tanpuina sum hman sak lawk an dil thin.

6. Mi tam takten bum an ni dawn tih hre miah lo leh rilru tha pu in heng mite bank account-ah hian pawisa an thawnsak fo thin.

7. Hetia pawisa thawn reng reng hi ATM Card hmangin rang takin an la chhuak nghal a, harsatna dang sawi belh zelin a tam thei ang ber laksak tumin dawt an sawi belh thin. Mi tam takin vawi 3-4 thlenga a nuai tela thawn pawh an awm fo a ni. Rinhlelhna a awm tih an hriat ve leh biak pawh theih lovin an awm zui a, Mobile phone, Whatsapp leh Social Media Site-a an relation pawh an titawp zui nghal thin.

Heng inbumna lakah hian mipuite kan him theihna turin i fimkhur theuh ang u.