Tunlai hian tuitlak avanga nunna hlu tak chan an tam ta hle mai a, pumpelh vek theih nilo mahse, fimkhurna avanga pumpelh theih tamtak a awm niin a lang. Nunna hlutak chhanhim nan mai bakah khawtlang mi tlawmngaite tha tam tak senral anih fo lohna turin mipuite fimkhur leh zual turin Police Department chuan a chah.

1. Tui tla tam tak hi lui tuilian daikai/hleuhkai luih tum avanga thleng a ni fo a, tuithiam tak tan pawh lui tuilian daikai luih tumlo a, a helna zawn hi a him zawk fo a ni.

2. Kan chenna hmun leh khawsakna hmun danglam zelah tuithiamlo kan tam ta hle mai a, tui thiamlo tan lui hriat ngailoh dai/hleuh tum ngawt hi thil hlauhawm tak a ni. Chuvangin tui hmunah kan intihlim duh anih pawhin swimming pool pangngaiah fimkhur taka in tihhlim hi a him a, lui hriat ngai loh a picnic hi a himlo a, hetiang hmuna in tihhlim avanga nunna chan an awm loh nan mitinte fimkhur tur a ni.

3. Rilru harh fim lo leh ruih nei chunga tui chen hi thil hlauhawm tak a ni a, chuvangin intihhlim nikhuaah pawh, tui chen kan tum anih chuan zu leh ruihtheih thil dang lakah in thiar fihlim phawt tur a ni.

4. Khawi hmunah pawh tui kan cheng dawn a nih chuan, kan bulah tui thiam tak, chetsual pawha min chhan thei tur an awm ve reng theih nan hma lak hia him fo a ni.