4016/2023-2024

29th February, 2024 : Environment, Forests & Climate Change Dept leh Police Training School, Thenzawl te chuan vawiin Ni 29.2.2024 chawhma dar 11.00 khan PTS Conference Hall, Thenzawl ah environmental awareness campaign an nei.

He programme ah hian Pu Ruatsanga Ralte, Principal, PTS chuan inlawmna thu sawiin Police- te chu Mizoram hmun hrang hranga kan awmna hmun a piangah dan kalha chetna titlem tur leh dan bawhchhiate man chhuah kawngah kan thawhhlawk thei hle ani tih sawiin, ramngaw leh nungcha dan lova ti chereu thinte man chhuah kawngah pawh forest department nena tangdunin nasa takin hma kan la thei a ni ti a. Mizoram environment chhe mek venhim kawnga nasa zawka thawk turin police kalkawmte hnenah fuihna thua a sawi a ni.

Pu Lalbiakchama Chawngthu DFO, Thenzawl chuan Power Point Presentation hmangin zirtirna a pe a. Mizoram chu green cover thatna state ni mah ila, ramngaw tha kan neih chhiat thu leh north east states pariat zingah pawh virgin forest/Very Dense Forest(VDF) nei chhe ber kan ni a. He ti chung hian ramngaw tikang nasa state kan ni reng bawk a. Hei hian kan ramah tui harsatna a thlen chho mek tih a tarlang a.Tin, ramngaw a chereu nasat avang leh leivung paih dan dik lo avangin kan luiah te siltation a nasa a, hei hian kan lui tuite a tih tlem bakah kan luite pawh hun rei lote chhungin hydel power pawh siamchhuak thei lo din hmunah a la chantir vek thei tih a tarlang bawk.

Pu Rongura Hrahsel, MFS Rtrd pawhin zirtirna pein, Ramngaw leh nungcha humhalh kawnga hriattur pawimawh te a tarlang a, environment humhalh chu mitin mawhphurhna a nih angin kalkhawmte thawhpuiah a sawm a ni.

He hun ah hian police Officer training lai mi 160 bakah Vantawng Group YMA,Joint MHIP, Thenzawl leh Thenzawl khawchhunga Village Forest Development Committee pathum te atangin mi engemaw zatin an tel pui bawk a ni.