4015/2023-2024

Dated Siaha 29th February 2024 : Vawiin chawhma dar 10 khan Siaha District Task Force on Immunization for National Immunization Day ( NID ) chu DC Mini Conference Room-ah an thukhawm a, Pi Lalnunmawii Addl. DC chuan thutkhawm hi a kaihruai.

Pi Lalnunmawii chuan sawrkar department leh NGO- hruaitu lo kalkhawmte hnena lawmthu sawina a nei hmasa a. Vaccine- tha tak a lak a nih chuan natna tam tak lakah kan him thin a ni tiin, vaccine lak hlau tlat awm thin chu thil an hriatchian tawk loh vang a ni, a ti. Vaccine tha taka lak a nih avangin Zenghri pawh India ram atangin umbo a ni tawh tih tarlangin, hmalam hunah he Zenghri natna hi a bo zel theih nan naupang kum 5 hnuailam tan tha tak a vaccine lak chhunzawm zel a tul takzet a ni, a ti. Siaha mipuite Vaccine- lak lo ngaipawimawh turin a chah a, a bik takin khawtlang hruaitute pawhin zau thei ang bera mipuite hnena vaccine lak theih hun leh pawimawhna lo puangzar turin a ngen a ni.

Pi Lalnunmawii chuan 'tihdam aiin inven a tha zawk' tih tarlangin Zenghri vei hma a lo inven chu thil tul tak a ni a ti. Natna vei tawh hnua in enkawl leh vak ai chuan tha taka lo inven hi a finthlak ber tiin, vaccine- a hun takah la zel thin ang u a ti. Zenghri natna chu umbo tawh ni mahse, mipuite inthlahdahna avangin kai/ vei thar kan awm thei reng a ni tiin, tha thlah theih a ni lo a, Health department- lam mawhphurhna chauh ni lo in, sawrkar department zawng zawng bakah khawtlang mipuite tanrual a tul a, theihtawp i chhuah tlang ang u tiin kalkhawmte leh Siaha mipuite a sawm a ni.

Dr. Lalnunziri, Sr. CMO, chuan India ram ataning Zenghri umbo ni tawh mahse, then awm ramah vaccine lak that loh avangin Zenghri natna hi a hluar hle a, Mizoramah ngei pawh he natna hian bu a khuar leh thei a ni tiin, Zenghri kailo tura vaccine lak uar a pawimawh hle a ti a . Covid- hluar lai ngei pawh khan Vaccine la tha leh tha lote dinhmun inthlauhna chiang takin kan hmu tawh a, Zenghri umbo zel tur pawh hian vaccine lak ngaihpawimawh a tul tak zet a ti. Siaha District- bik chu 'Polio surveillance' ah India ramah pakhatna a ni mek tih a tarlang a, hei hi thawhrimna rah a ni a, inthlahdah theih erawh a ni lo tiin hmalam pana kan kalzel a tul tak zet a ni, a ti. Nikum khan Siaha atangin Zenghri natna vei ringhleh mi pali lai an awm a, hei hian tan lak thar zel a tul zia a tilang chiang hle a ti.

Dr. Zochhuanawmi, DIO chuan Siaha District - a National Immunization Day (NID) kalpui dan tur tlangpui sawina nei a. Kum 1995 atang khan 'Intensified Polio Pulse Immunization (IPPI)' chu India ramah kalpui tan a ni, a ti a. Kumin 'National Immunization Day' chu March ni -5 ah hman a ni dawn a, naupang kum 5 chin mi 7270 hnenah Zenghri danna pek tum a ni, a ti. Hemi atan hian Polio Vaccination Booth- 91, leh Transit Booth - 2, ruahman niin, ral tlante tan hian Booth- 4 siam a ni bawk a ti. Zenghri danna vaccine pechhuak tur hian Anganwadi leh ASHA- a thawkte beisei leh an ni dawna, Vaccination booth- a lokalte vaccine an pek bakah 'Home Visit' pawh an nei nghal ang a ti. Naupang 'vaccine' la te chu an kut veilamah chhinchiah an ni ang a, hetiang chhinchhiahna nei lo naupang hmu an awm pawha inhriattir zel turin a sawm nghal bawk.

Vawiin thutkhawmah hian sawrkar Deparment- hotute bakah NGO- aiawhte an tel thei a ni.