Vawiin atang khan naupang kum 5 hnuai lam te hnenah zenghri danna polio vaccine pek tan a ni leh ta a. Hawnna inkhawm hi Aizawl Civil Hospital Auditorium-ah neih niin Health Minister Pu Lal Thanzara chu khuallian a ni.

Pu Lal Thanzara chuan India ram atanga zenghri umbo a lo ni ta chu thawktute thawhrimna leh inpekna rah a ni, tiin an chungah lawmthu a sawi a. India ram chu zenghri awm lohna ram ‘polio free’ ni tawh mahse khawvel hmun thenkhatah zenghri natna hi hmuh a la nih cheu avangin fimkhur taka a umbona hna hi kalpui a la tul a, he hri laka invenna vaccine chu nausen piang hlim atanga kum 5 chin te chuan an la ngei tur a ni, a ti. Minister chuan nu naupaite damdawi iron mum sem thin tlakchham chungchang sawiin a chinfel hna department in a thawk mek a. Kum dangah Iron mum hi a thlawnin sorkar laipui atanga dawn thin a nih laiin tun tum ah erawh dawn a nih tak loh avangin he harsatna hi a lo awm a ni, a ti.

Health Minister chuan thisen sawngbawlna senso phuhrukna atana sum lak tul ta chungchang pawh sawi fiahin sorkar laipui NACO (National AIDS Control Organisation) atanga thisen pekna hmanrua – blood bag, test kit leh mamawh dangte a thlawna dawn thin chu tihtawp niin heng hmanrua leina tur senso 25% chu state sorkar tum tura a phut bakah, tanpuina hrang hrang hmuh thinte tihhniam vak a ni a. Miin thisen a thlawnin pe mahse damlovin a hman theih tura thisen siam nan unit khatah Rs. 1,200 vel sen a ngai thin a, kum khat chhungin thisen sawngbawl man hi cheng nuai tam tak sen ral a ngai thin a. Thisen sawngbawlna senso phuhrukna tur pawisa lak a lo tul ta hi thisen man a ni lo tih hrethiam turin Health Minister chuan mipuite a ngen nghal bawk a ni.

Medical Superintendent Dr.Rosangluaia kaihhruai National Immunization Day for Polio, 2015 hawnna inkhawmah hian Principal Director Dr.K.Ropari leh Director Health & Medical Education Dr. Lalbiakkima te pawhin thu an sawi.

Zenghri umbo beihpui hi India ramah sorkar laipui hmalakna in kum 1995 khan tan a ni a. Rampum huapin he hmalakna hi chak taka kalpui niin Mizoramah chuan kum khatah vawi hnih neih thin a ni. Zenghri venna beihpui hi ramchhung hmun dang ah chuan January ni 18 khan neih tan a ni tawh a, Pathianni a nih avangin Mizoram ah chuan January ni 19 Thawhtanni hian neih tan a ni. Mahni awmna hnai ber sub-center ah leh IPPI Booth tin ah zenghri venna hi a thlawna lak theih a ni. Zenghri venna (Polio Vaccine) hi Mizoram pumah naupang 1,35,086 hnenah pek tum niin, hemi atan hian a lakna hmun tur IPPI Booth 1306 siam a ni. Kum kal ta January 2014 a beihpui thlak a nih khan an target za a za an tlin thei a ni.

Kum 1994 khan India ram pumah zenghri vei mi 35,000 report a ni a. Zenghri umbo beihpui thlak a nih atanga kum 16 a liam hnu kum 2011 ah chuan zenghri vei hi mipakhat chiah hmuh a ni ta a. Hemi hnu hian zenghri vei an awm tak loh avangin March 27, 2014 ah chuan World Health Organisation chuan India ram chu zenghri awmlohna ram ‘Polio Free’ ah a puang ta a ni. Chutihrual erawh chuan ram thenkhatah polio hrik hi hmuh a la nih avangin uluk takin vaccination hi kalpui a la tul a. Ram danga zinchhuak tur reng reng, nausen atanga pitar putar thlengin, an zinchhuah hma thla khatah tal vaccine hi an la ngei tur a ni a. Vaccine an la ngei a ni tih hriatpuina certificate an ken a tul tawh a ni.