Vawiin chawhnu khan Lunglei South Thalai Kawng Tha Duh Pawl aiawh te chuan PWD Minister Pu Lal Thanzara chu a pisaah hmu in A.O.C to Zobawk kawng chungchanga an harsatna tawhte chinfel pui turin an ngen.

Lunglei South Thalai Kawng Tha Duhpawl aiawh te hi an Chairman Ngurthansanga Sailo, Vice Chairman Jacob Vanlaltana leh Asst. Secretary Vanlalliana Pachuau te an ni a. National Highway No.54-A, A.O.C to Zobawk kawngpui siam that a nih theih nan vawi tam tak tlawmngai pawl te kaltlang pawha hma lak a nih tawh hnuah vawiin thlenga kawng siam that a la ni lo chu hriatthiam har an tih thu leh motor khalh thin te’n an tuar piah lamah mipui mimir hriselna thlengin kawng chhia hian a khawih pawi nia ngaiin PWD Minister hnenah a rang thei ang bera siam tha turin ngenna an thlen a ni.

Hemi chungchangah hian PWD Minister Pu Lal Thanzara leh amah tawiawmtu PWD Chief Engineer (Highways) Pu John Rammawia leh SE Pu Henry Lalmuankima te chuan he kawng siam that an ngaih pawimawh thu leh a siam tur contractor pawh thlan fel thuai an beisei thu an sawi a. Tum nga lai a thawk tur contractor zawnga tender an chhuah hnuah chhangtu an awm theih loh avanga harsatna an tawh dan te an hrilhfiah a ni.

PWD hotute tarlan danin Lunglei chhim lam kawng NH-54A, Lunglei (A.O.C Ramthar) atanga Hrangchalkawn kawngpui siam tha tur hian Ministry of Road Transport & Highways chuan March 31, 2014 khan cheng nuai 493.04 a sanction a. Tender hmasa ber chu 4.3.2014 ah tihchhuah niin online e-tendering chu technical problem a awm avangin cancel a ni a. 23.05.2014 ah tender chhuah nawn leh a ni a. National Highway a nih avangin sorkar laipui MoRTH kaihhruaina zawm a tul a. MoRTH phut angin single tender a chhuah lovin tender pahnih a then a ni a. Tender hi mi pakhat chauh chhangtu an awm avangin 30.09.2014 ah tender chhuah nawn leh a ni a, a vawi li na atan 30.10.2014 ah tender tihchhuah a ni leh a. Tender vawi li chhuah a nih hnuah pawh a thawk duh contractor an awm leh tak loh avangin a vawi nga na atan 8.12.2014 ah tender dang chhuah leh a ni a. Contractor pahnih in an chhang ta a, tunah hian tender document enfiah sak mek an ni a. Dan anga tih fel a nih veleh contractor thlan hian hna a thawh tan nghal PWD hotute chuan an beisei a ni.