Vawiin hian DC Conference Hall Serchhip ah Special Summary Revision of Photo Electoral Rolls lo awm leh tur atana inbuatsaihna kal zelah Serchhip District Level Standing Committee te chu Addl District Election Officer, Pu VL Remliana, MCS hovin an thukhawm a, District chhunga Polling Station pali siam rem dan tur an rel.

Chairman Pu VL Remliana chuan, New Serchhip, Khawbel, Hmunzawl leh North Vanlaiphaia Polling Station siam dang lam deuh ngai leh an ngaih chhan te sawifiahna a nei a, 26 Serchhip ST chhunga 26/20 New Serchhip II, voters 555 te awmna Polling Station atana hman mek Elite Middle School chu Polling Station Area pawnah a awm a, Polling Station Area chhungah Government Primary School a awm tho si avangin hetah hian sawn tha a hriat a ni thu te, 27 Tuikum ST chhungah 27/17 Khawbel, voter 384 awmna Polling Station atana Government Primary School hman mek chu Electric a luh loh bakah lirthei a luh theih loh avangin Government Middle School zawk chu Polling Station atana hman a remchan zawk thute, 28 Hrangturzo ST chhunga 28/2 Hmunzawl, voters 305 awmna Polling Station atana hman mek Government Middle School chu khaw dai hla deuh taka awm a ni a, Government Primary School a sawn mai a remchang nia an hriat thute leh 28/24 N. Vanlaiphai III, voter 598 awmna Polling Station atana hman Government Primary School V chu sawrkar in Government Primary School III tia a hming thlak a nih tak avanga Polling Station hming pawh thlak ve mai a tul nia hriat a nih thute a sawi a. Heng Polling Station hrang hrang chungchang hi member kalkhawmte hian an ngaihtuah ho a ni.

Heng Polling Station siam rem tul hrang hrangte hi District Level Standing Committee hian a pawm hlawm a, ti hian Joint Chief Electoral Officer hnenah phal sakna dila la thawn thlak leh tur a ni dawn a ni. Vawiin meeting ah hian Electoral Registration Officer te, Assistant Electoral Registration Officer te leh Political Party hrang hrang aiawh te leh tlawmngaipawlte an tel a ni.