Vawiin chawhma dar 10:30 khan Serchhip District Executive Force chuan SP Conference Hall-ah Ruihhlo Do Beihpui Thlak kalmek atana inbuatsaih nan The Narcotic Drugs and Psychotropic Substances Acts (ND & PS Act) Case chung changa investigation neih dan training an buatsaih.

He training hawngtu Pu Lalringdika, MPS, SP Serchhip chuan hetianga tha zawka hna thawh a nih theih nana intuaihriamna hun an nei thei chu lawmawm a tih thu a sawi a, Police Department in ND & PS Act an ngaihpawimawh zia leh ruihhlo do nana an hman tangkai thin zia  sawiin, training tura kalkhawmte chu theihtawp chhuaha zir turin a fuih a ni.

Ruihhlo hmanga sumdawngtute leh dan bawhchhiate hi ND&PS Act hmanga umzuia, hremna pek thin an ni a, misualte hnena an phu tawk hremna pek dawn chuan man an nih lai atangin he dan in min hrilh ang thlapa kan kal a ngai. Chuti lo chuan hah tak hna kan thawhte a thlawn leh mai thei thin a ni. Police te phei chuan kan hriat ngei ngei tur dan a nih avangin vawiin ah uluk taka zir a, hlawkpui ngei kan tum tur a ni, tiin kal khawmte chu a chah a ni.

Pu Lalringdika chuan, misual leh dan bawhchhia man harsa tak takte kan manin kan lawm a, chawimawina hialte kan in pe thin, hei hi a tawpna ni mai lo se, dan bawhchhiate chuan an phu tawk hremna an hmuh ngei theihna turin dan ang taka engkim kan kalpui zel a, court-in engtin nge thutlukna a siam tih thlenga ngeihven zui zel hi kan mawhphurhna a ni a, Serchhip Police-in ND & PS Act hmanga kan man te chu za ah za convict an nih theihna turin leh midangte entawn tlaka hna thawk turin kan inbuatsaih tur a ni, a ti bawk.

Vawiina trainingah hian Serchhip District chhunga awm Police Inspector 3, Sub-Inspector 6 leh Literate Constable 6 an tel a, Chawhma lamah ‘Investigation of ND & PS Act Cases’ chungchangah Pu M.S. Dawngkima, MPS, Addl. SP Serchhip chuan power point hmangin zirtirna a pe a. Chawhnu lamah Pi Avilla Laltanpuii, Asst. Public Prosecutor, Serchhip District Court chuan ‘Investigation of Cases by Police an Common Lapses by Case I/O’s’ chungchangah zirtirna a pe bawk.

Training hi Pu M.S. Dawngkima, MPS, Addl. SP Serchhipin a kaihruai a, vawiin training chu  Ruihhlo Do kick off kan neih tak bawhzui nana a bik taka buatsaih anih thu a sawi a. Pu Lalchhuanawma Chhangte, MPS, SDPO Serchhip chuan kharna hun a hmang  thung a ni.