Pu R. Romawia, Higher & Technical Education Minister chuan vawiin khan Student Bar Council, Govt. Mizoram Law College in Fresher Social 2016 I & PR Auditorium a an neih chu a hmanpui. Inkhawm hi Runremmawia, Vice President, HBC in a kaihruai a ni.

Pu R. Romawia chuan tunlai khawvelah Dan hriat a pawimawh tawh zia sawiin dan hmang hian tanpui ngaite leh mi harsa te tanpuina hmanrua tha tak a nih thu a sawi a. Ram in hma a sawn zelna ah hian Law Institution te leh Law expert te hi thurawn pe turin mamawhna a sang ve zel a ni tiin Minister chuan tuna Law College a zirlaite chu an zirte hrechianga mite tana chhawrtlak an nih theih ngei a beisei thu a sawi a ni. Ram khua leh tuite hi Dan hnuaiah kan awm vek a, tumah dan chunga leng an awm lo a, chuvangin buaina te, harsatna te lo thlen hian dan hi min hrut rual vektu a ni tiin Minister chuan Dan zirchian hi a pawimawh a ni a ti. Minister hian Govt. Mizoram Law College 21st Annual Magazine 2015 - 2016 ‘Jurisprudentia’ chu a tlangzarh nghal a ni.

Govt. Mizoram Law College hi August 25, 1983 khan tan niin, September 19, 2013 khan Provincialised a ni a. Tunah hian he College atang hian Law Graduate 390 an awm tawh a ni. Kumin May 5 khan an building thar Luangmual a mi chu hawn a ni.

Vawiin inkhawmah hian thisen a zawna kum 3 pe te hnenah chawimawina pek an ni.