Department of Agriculture (Crop Husbandry) huaihawtin DAO’s Conference Hall, Kolasib ah vawiin khan ‘Trainers Training on Onion Cultivation under NEDP’ neih a ni a. Pu R. Lalnunzira, MAS, District Agriculture Officer, Kolasib District in kaihruai in, Dr. C. Lalzarliana, MAS, Director of Agriculture (CH) chu khuallian a ni.

Dr. C Lalzarliana chuan, ‘Agriculture Department, Kolasib District hnuaia Officers leh Field Staff te hmalakna leh thawhrimna chu fakawm a tih thu sawiin, Technology thang zel mila buh leh thlaite kan enkawla, Department hmalakna in awmze a neih theihna turin intuaithar a pawimawh thu a sawi a. NEDP hnuaia Purun chin turte hi a chi tha bik Department in lachhuak tura hma a lak thu leh Mizoram a rawn thlen tep tawh thu tarlangin, he kan hmalakna tur hlawhtlinpui ngei hi kan tihmakmawh a ni’ a ti.

He hunah hian Pu Lalthanzuala, MAS, Deputy Director (Agro) leh Pu Mana Samte, MAS, Manager Thingdawl Farm ten Purun chin dan leh enkawl dan chungchangah zirtirna an pe a. Kolasib District chhunga Agriculture Office te, Field Staff te leh KVK Senior Scientist & Head te tan training hi buatsaih a ni.