Vawiin khan Inter-Departmental Coordination Committee (IDCC) on Civil Registration System chu Aijal Club-ah thukhawm in, Mizoram mipui piang leh thi zat zawng zawng dik leh rintlak taka chhinchhiah anih theih nana hnathawh dan te, harsatna tawh te leh chung harsatna te sutkian a nih theih dan tur an sawiho a; certificate diklo siam leh dan lova certificate a thuziak lo thlak awm thin thu ah mitin mawhphurhna a nih thu leh kan fimkhur tlan a tul zia sawilan a ni.

Meeting kaihruaitu Dr. C. Vanlalramsanga, Chief Registrar of Births & Deaths leh Planning & Programme Implementation Department Secretary ni bawk chuan Births and Deaths registration-ah Mizoram chu state dangte nena khaikhin in a thawk tha berte zinga ami a nih thu leh, mawhphurtute thawhho na that vang anih thu a sawi a. Chutih rual chuan hmabak tam tak a la awm avangin tha thlah lova fimkhur taka thawhho pui zel turin member te chu a sawm bawk a ni.

Vawiin meeting-ah hian kum 2020-a Mizoram mipui thi leh piang zat zawng zawng chhinchhiah (100% registration) hman vek tura hmalakna ‘Action Plan’ siam zulzuia hnathawh dan thlirho a ni a. Hemi atan hian nasa lehzuala media hrang hrang kaltlanga inhrilhriatna pekchhuah bakah thingtlang hmun hrang hranga awareness campaign neih te, Kohhran leh tlawmngai pawlte thawhpuina ngen te leh Local Registrar-te hnena training pek chungchangte rel a ni a. Sorkar hna thawh rei duh vang te, sports intihsiaknaa tel duh vang te leh chhan dang hrang hrang avanga pian kum diklo a Birth Certificate thar siam tum te, India khua leh tui nilo ten thildang atana an hman tangkai duh vanga Birth Certificate dil mai te, Sorkar puihna leh hamthatna um avanga mitthi tawh pawh dam anga la ziah tlat te chu an thil tawn thin anih thu meeting-ah hian tarlan niin, hetiang lakah hian thawktu te ber atanga lian ber te bakah mipui pawh kan fimkhur a kan rinawm tlan a pawimawh thu tarlan a ni.

Mizoram Registration of Births & Deaths (Amendment) Rules, 2015-in a tarlan dan chuan mi a pian emaw a thih atanga ni 1-21 chhunga Local Registrar of Births & deaths hnenah an in ziahluh chuan pawisa chawi a ngailo ang a. Ni 22 – 30 chhunga a in register chuan Certificate man Rs.100 bakah late fee Rs.10 a chawi a ngai ang. Ni 31 atanga kum khat chhunga a in register chuan Local Registrar ni tawh lovin Addl. Chief Registrar of Births & Deaths emaw, Asst. District Registrar of Births & Deaths pan tur a ni a, late fee Rs.100 an chawi a ngai tawh ang. Pian ni / thih ni atanga kum khat hnu lama in register tur chuan mahni District tina Judicial Magistrate 1st Class an pan tur a ni a, late fee pawh Rs. 1000 an chawi a ngai a ni.

Nau piang hming report chungchangah hian, nau piang chu a hming phuah hmaa register a nih chuan thla 12 chhungin nau hming Registrar of Births & Deaths hnenah a report thei ang a. Kum 2007 hmaa nau piang chhinchhiah tawh te chu RBD Rules thar hman atanga kum 5 chhungin naute hming ziahluhtir theih ani a (late fee Rs.50 pek a ngai ang); RDB Rules thar hman atanga nau piang register tawh, hming la sak loh chu kum 15 chhungin hming ziahluhtir theih a ni bawk (late fee Rs.50 chawi in).