A vawi khatna atan vawiin khan District Legal Services Authority buatsaih in Aijal club ah Law & Judicial Department Minister Pu Lalsawta hovin Distribution Ceremony of Victim of Crime Compensation programme hman a ni. Vanduaina hrang hrang thihna, pawngsual leh a dangte tawktu mi 14 te hnenah Rs 8,50,000/- (cheng nuai riat leh sing nga) pek chhuah a niin Rs. Nuai khat dawng leh Rs. Sing nga in pek an ni a. Law & Judicial Department-a Officer leh thawktu te bakah vanduaina tuartu leh an chhungten vawiin hian hun an hmang ho a ni.
Vawiin a kalkhawm chhan hi lungchhiat thlak lam mah nise, harsatna leh vanduaina tawktute sorkar-in a chhawmdawlna a pek function hman vawikhatna a niin hun lawmawm tak chu a nih thu khuallian Pu Lalsawta chuan sawiin hetiang programme ang hi neih fo erawh chu ngai lo se a duh thu a sawi a. Sualna leh vanduaina te hi khawvel awm chhung chuan a bo tak tak a beiseiawm lova, vanduaina tawktute mi harsa leh rethei zawk te an lo nih phei chuan a tisualtu lam in vaubet in FIR thehluh tawhte pawh la let leh duh hial in an vaubet thin tih thawm pawh hriat a ni thin, chutiangah chuan tanpuitu neilo ang hiala in ngaih tur anih loh thu leh zam loh tur anih thu a sawi a. Vanduaina tawk tu leh humsual daia harsatna tawk ten sorkar-ah chhantu an nei a, chu chu Law & Judicial Department te an ni a, Dikna chu a dingchang zel ang tiin Minister chuan mi tupawhin vanduaina an tawhin hmasa berin Police ah FIR thehlut a ngaih thu leh chumi hnu thla ruk ral hma in Mizoram State Legal Services Authority ah thlen tur a nih thu a sawi.
Mizo tawngkam leh Bible lehlin dana Fel leh Dik awmzia sawifiahin Pu Lalsawta chuan Dik tih hian a kawk fiah zawk a, Fel chu a theih mai, fel takin a corrupt theih a, mi fel tak ai chuan mi dik hi an ropui zawk a, Law & Judicial Department pawh hian hei hi hre reng in theihtawp an chhuah a ni a, hetianga Dan leh thupek te tha taka kenkawh hi Pathian rawngbawlna a nih thu a sawi bawk.
Vawiina vanduaina tawktute hnena chhawmdawlna pek te hi an vaiin mi 14 an ni a, vanduaina tawktu ber te hi dawngtura an mahni ngei an lo kal beisei an ni lova, Dan pawhin chu chu a phalsak in an mahni kher a phut lo tiin Khuallian Pu Lalsawta chuan a sum fai in an chhungte hnenah a hlan a ni.
Pi R. Lalduhawmi, Secretary, ADLSA kaihhruai vawiin programme ah Pu Joel Joseph Denga, Member Secretary, Mizoram State Legal Services Authority chuan programme sawihawnna leh sawi fiahna hun a hmang a. Vanduaina tawk palh an lo awm anih chuan Mizoram State Legal Services Authority ah office hun chhunga biak pawh theih reng an nih thu leh vanduai dan azira chhawmdawlna an pek theih dan hrang hrang te a sawi. A tuartu hi naupang kum 14 hnuailam a nih chuan tanpuina hi 50 % in a pun theih dan te leh thil sual titu chu hriat ni lo mahse a tawrhna avangin zangnadawmna pek theih anih dan leh tunah hian hetiang chhawmdawlna zarzotu hi mizo zingah mi engemaw zat an awm tawh thu a sawi.
