No.4159/2021-2022

Aizawl, 2nd March 2022 : Ports, Shipping & Waterways changtu Union Minister Sarbananda Sonowal chuan zan khat riak turin Mizoram a rawn tlawh a. Vawiin tlai khan SAD Conference Hall, MINECO-ah Mizoram chhunga lui liante cheibawl a, inkalpawhna inland water way siam dan tur an rel a. He meeting-ah hian Transport Minister Pu TJ Lalnuntluanga, Chief Secretary Dr.Renu Sharma leh mi pawimawh dang te an tel a ni.

Pu Sarbananda Sonowal chuan Mizoram chhunga lui hmanga inkalpawhna (inland waterways) siam a nih theih nan Sawrkar Laipui leh Mizoram Sawrkarin thawhhona tha zawk an neih theihna tur ngaihtuah ho a nih thu a sawi a. Mizoram Sawrkarin hma a lak tawhna leh project hrang hrang an neih te uluk taka a ngaihthlak thu leh heng hmalakna hrang hrang te hi reiloteah tha taka bawhzui a, bungrua leh khualzin mite phurhna turin tangkai taka hman thuai theih a nih a beisei thu a sawi a ni. Prime Minister Pu Narendra Modi chuan hmarchhak state te hmasawnna a dah pawimawh hle tih Pu Sarbananda Sonowal chuan a sawi a, a sawrkar tirh phat atanga vawiin thlengin Mizoram leh hmarchhak State dangte kawng tinrenga hma an sawn theihna tur a ngai pawimawh a, kawng tam takah hmasawnna hmuh tur a awm mek zel a ni, a ti bawk. Union Minister chuan India ram hmasawnna leh intodelhna turin state tin ten hma an sawn a tul a, Mizoram hmasawnna tura Sawrkar Laipuiin project leh scheme tam tak a siam te pawh dik tak leh tangkai taka hman a nih ngei a beisei thu a sawi a. Mizoram chu lehkhathiam tamna State, mipuite pawh changkang leh hmabak eng tak nei an nih ang ngeiin sawrkar laipui hmalakna kaltlangin State sawrkar leh Mizoram mipuite thahnemngaihna nen, India rama State hlawhtling ber zinga chhiar tel an nih thuai a beisei thu a sawi a ni.

Pu TJ Lalnuntluanga chuan Mizoram mamawh chaw lut turin kawngpui pawimawh pakhat chauh kan neih avanga harsatna State in a tawh fo thu leh Mizoram chhunga lui lian te cheibawl a, bungrua leh mamawh dang lakluhna atan mai bakah mipui zin veivak te chhawr tangkai theih turin inland waterways siam a tulzia a sawi a. Mizoram Sawrkarin lui lian tak tak a neih te inkalpawhna atana cheibawl a nih theihna tura Sawrkar Laipuiah rawtna a lo siam thin thu te, Union Minister Pu Sarbananda Sonowal-a thahnemngaihna avanga chak taka bawhzui mek a nih thu a sawi a. Heng project zingah hian Khawthlangtuipui/Tuichawng cheibawlna tur thawhkhatna phei chu sanction hmuh a nih tawh thu sawiin Union Minister hnenah hian Pu TJ Lalnuntluanga chuan lawmthu a sawi a ni.

Transport Secretary Pu KT Beichho chuan Mizoram Sawrkarin Inland Waterways project hrang hrang a neih te chipchiar takin he meeting-ah hian a tarlang a. Khawthlanngtuipui (Karnaphuli) - Tuichawng (23 kms) atana DPR thehluh chu Sawrkar Laipuiin a pawm tawh thu te, a thawhkhatna atan Central Sector Scheme hnuaiah cheng vaibelchhe 6.17 ruahman a nih thu te, advance installment cheng vaibelchhe 1.23 chu Mizoram Sawrkar sumbawma a luh thuai theih nan January 12, 2022 khan Chairman IWAI hnenah ngenna thehluh a nih tawh thu a sawi bawk. Tlawng luiah Khamrang khua atanga Assam State chhung Gharmura kalpawh theihna tur 87.136 km a thui siamna turin survey neih a ni tawh a, he survey report atang hian DPR siam niin IWAI Chairman hnenah thehluh a ni tawh bawk. Tuipui D atanga Lomasu inkalpawhna tur 138.26 km a thui chu final proposal thehluh hmabak a ni a. Khawthlangtuipuiah Rajivnagar khua atanga Tuichawng khua (128.08km) inkalpawhna tur proposal thehluh a ni tawh bawk.

Vawiin meeting-ah hian Kaladan Multi Modal Transit Transport Project thlen chin leh hmabakte report a ni bawk a. Sawrkar Laipui atangin Inland Water Transport Senior Adviser Pu Sunil Kumar Singh chuan report a pe a. Mizoram Sawrkar aiawhin PWD SE (Southern Circle) Pu Vanlaldika’n report a pe bawk.

Chief Secretary Dr Renu Sharma chuan lawmthu sawina hun a hman zawhah meeting hi tihtawp a ni.