No.4160/2021-2022

Aizawl, 2nd March 2022: Vawiin khan Lok Sabha MP Pu C.Lalrosanga chuan Department of Telecomunication(DoT)chu an office Khatla ah tlawhin Telecom hotute nen Mizoram tana Telecom Project hrang hrang te an sawiho a.

Telecom department hotute chuan an hmalakna hrang te an sawifiah a. Mobile signal awm lohna khua ten signal an neih theih na turin Comprehensive Telecom Development Project(CTDP) kalpui mekah,signal awm lohna khua 252 ten signal an neih theih nan mobile tower thar 227 bunbelh tura hmalak mek a ni a. Heta tan hian Universal Service Obligation Fund(USOF) atangin Rs 196.08 crore senna tur hna, Tender kaltlangin M/S Bharti Hexacom Ltd te chu Department of Telecomunication (DoT)ten ni 08.12.2012 khan agreement an lo ziahpui tawh a. He Project hmang hian mobile tower 214 dinfel tawh a nih bakah khaw 232 in signal an nei thei tawh a, khaw 161 atan Mizoram sorkar nen tangdun a hmalak mek a ni bawk.

BharatNet Project hmangin khaw 41 chu Optical Fiber Cable a thlun zawm a ni a, khaw 417 te tan Satellite terminal bun fel tawh a niin hei hi hman tangkai thuai a nih theih nan Sorkar in chak zawkin hma la se an duh tih deptmartment hotute chuan an sawi a.

Prime Minister's Wi-Fi Access Network(PM-WANI) hi Telecom Department kaltlang lova mipui vantlang-in internet access an neih theih nana hmalakna a nih avangin tlawm zawka mipui ten internet an hman theih nan leh eizawnna peng thar atana chhawr tangkai a nih theih nan Mizoram sorkar nen hma lak a tul thu MP chu an lo hrilh a ni.

Mobile signal awmna khuaah te ngei pawh Optical Fiber Cable thlun zawm a nih loh avangin mamawh phuhrukna tur internet speed neih theih ani lova. Tlangram kawng tha tawk a awm rih loh avangin Electric Power line ground wire te chu Optical Ground Wire a thlakna turin Mizoram sorkar in hma la se an duh tih department hotute chuan MP hi an hrilh a ni.

Pu Rosanga chuan tunlai khawvela Telephone/Mobile phone tangkai tawhzia leh hmasawnna atana a pawimawh zia ngaihtuahin Telecom Department-in hetianga Mizoram hmun hrang hrang leh hmun kilkhawr tak tak a chengte pawhin mobile signal an neih theih nan hma an lakna chu fakawm a ti a. Signal awm that lohna ramri dep hmun hrang hranga chengte tan chak zawk a tan lak a tul thu sawiin Pu Rosanga chuan department hotu ten an hmalakna kal mek a hnena an sawi te chu a tul ang leh a theihna chin chinah theih tawp chhuaha a lo bawhzui tur thu a hrilh a ni.

Vawiina an inkawmnaah hian Pu K.Srikrishna,DDG,DoT, Pu C.Lalhmachhuana Director, DoT leh “Pu Arun Kumar GM, BSNL te an tel a ni.