No.1929/2021-2022
Aizawl 19th August 2021: Vawiin khan Power & Electricity Department Minister Pu R.Lalzirliana hovin pawl hrang hrangte, SAW Conference Hall, MINECO-ah electricity bill chungchang sawiho na an nei.

Minister Pu R.Lalzirliana chuan sawrkar hian kum kalta kha khan cheng vaibelchhe za sawmruk pathum mipui te chan tirit lo turin electric power man hi a tlawm zawkin (subsidized rate) in a pe a, nikum December khan Covid-19 harsatna-ah pawh hian sawrkar chuan cheng vaibelchhe sarih chu mipuite harsatna sukiangin a lo peksak tawh a, a ti a. Kuminah erawh Covid-19 a lo hluar a, inkhuahkhirh te a lo ngai leh a, chutih laiin electric bill thla tin pek a ngai a, thla khatah cheng vaibelchhe sawmhnih paruk bawr vel pek a ngai a, chu chu kum dang anga central atanga sum kan beisei kan hmuh regular lutuk loh avangin pek hleih theih a ni lo a, theih ang tawkin Finance lam pawh nasa taka an biak thin thu leh sum dahkhah a nih loh chuan power chhit tur hi power leina ten an cut sak theih a ni, tiin a sawi a. Tariff a san dawn hian public notice JERC lamin an chhuah thin thu te sawiin, Mizoram chu Northeast ah tariff San lohna ber pawl state a nih thu a sawi bawk a ni.

Thutkhawmna-ah hian pawl hrang hrang- Mizoram Consumers’ Union, MIMA, CYMA, MJA, MUP leh MHIP aiawh ten electric bill chungchanga mipui harsatna hrang hrang an sawi te ngaihthlak a ni a. Hriat thiamloh laite inhrilhfiahna hun neih a ni nghal bawk a ni.

Thutkhawmna-ah hian hripui leng avanga metre reading neih dawna harsatna a awm loh nan, dan angin metre box pawn-ah dah zel ni thei se, metre reader ai kal la an awm a nih chuan sawrkar hotuten ennawn se, dam lohna vang leh harsatna bik nei te an awm a nih chuan an ai awh turin hotuten a thiam an ngaihtuah ang tih pawm a ni a. Bill complaint period pawh August ni 31, 2021 thleng pawhsei ni bawk se, Aizawl chunga bill complain-na hmun pasarih awm mek chu, covid laka kan him tlan nan, hmun thawveng tha deuhah siam belh ni se tih tlan a ni bawk a ni. Thla thum chung bill lo kal pek harsatna nei te chuan a thla khat te te an pek theihna tur ngaihtuah ni se, amaherawh chu electric bill sanna tariff erawh tih danglam theih a nih loh thu tarlan a ni bawk a ni.

Aizawl khawpui chhunga February atanga May thla bill pe average hi 81.42% a nih laiin, June leh July thla bill pe average hi 52.01% a ni. June atanga July thla bill pe thlemna zat hi 23572 a ni.