2646/2024-2025
Mizoram Sawrkar hna pawimawh thawk leh hlenchhuak tura zinchhuak, kan Minister zahawm tak Pu F.Rodingliana leh amah zuitu Official ten, October ni 12 (Inrinni) 2024 tlai dar 4:00 velah Kawlbem khua an lut tur chu, 2nd Battalion Assam Rifle ten khaw daia Check gate an siamah zurui chungin an lo tiding mai nilovin, mawilo takin an Motor bang an bensak te leh, an hming te zawta an hun hlu tak an lo tihkhawtlaisak hi kan Minister leh Mizoram mipui zahlohna ah kan ngai a. Assam Rifle Post Commander in a naute chetdan mawilo tak avanga kan Minister zahawm tak hnenah ngaihdam a dilna chu kan Minister zahawm takin a ngaihdam mai bakah, State Minister chunga an tih atana diklo leh tullo te dawhthei leh tha taka a la hrilhfiah thei hi kan Minister zahawm tak hi kan chhuang hle a ni.
Assam Rifle te ngaihdam dilna tha taka ngaihdam saka an inkalsan tawh hnuah, kan Minister zahawm tak leh amah zuitu ten Ngopa atanga Champhai an pan leh tur chu, October ni 14 (Thawhtanni) 2024 zing 6:15 velah Ngopa khawdai Petrol Pump bulah Assam Rifle ten tihdin an lo tum leh hi Mizoram mipui te thamlohna leh zahlohna ah kan ngai a. Tin, hei pawh duh tawk lovin, Champhai atanga Aizawl an pan mek laiin, October ni 17 (Ningani) 2024 chawhnu dar 1:00 velah Aizawl thlen hma lawk Bung Banglow leh Berawlui inkar kawngpuiah 2nd Battalion Assam Rifle Captain hovin ralthuam nena rikrap taka an lo tiding leh a hun hlu tak an lo tihkhawtlaisak duh leh zel te hi kan hrethiamlo tak zet a ni. Mizoram State Minister zahawm tak leh, kan Department enkawltu ni bawk, Mipui ten kan aiawha kan thlan leh kan ram hruaitu Minister zahawm tak a nih tlat avangin, a chunga Assam Rifle te chet dan hi Mizo mipui zahlohna leh thamlohna ah kan ngai tlat a ni.
Kan Minister zahawm tak chunga thil thleng duhawmlo avang hian Assam Rifle hotu ten Mizoram Sorkar leh kan Minister zahawm tak hnenah ziakin ngaihdam dilna thlen ngei tur in Assam Rifle te hi keini P&E Officer leh Staff te chuan kan phut tlat a. Hetiang thil duhawmlo thlen tirtu Assam Rifle official te chungah dan angin Ministry of Home Affairs, Govt. of India in action la zui nghal ngei turin kan phut tlat bawk a ni. Tin, tun hnuah hetiang thil duhawmlo hi tu chungah mah thleng nawn tawhlo se kan duh tak zet a ni.
Assam Rifle ten kan Minister zahawm tak chunga thil duhawmlo an thlen tir chungchangah hian, keini P&E Officer leh Staff te chuan kan Minister zahawm tak thlavang hi kan hauh tlat zel dawn a ni.
