2645/2024-2025

Dated Hnahthial, the 22nd October, 2024: Vawiin khan District Agricultural Marketing Committee (DAMC), Hnahthial chu DC Meeting Hall-ah thukhawmin Handholding Policy hnuaia Thlai Thar Marketing kalpui dan tur chu DC leh DAMC Chairman ni bawk, Pi Rita Lalnunmawii Pachuau kaihhruaina hnuaiah rel ho a ni.

Bana kaih policy chungchang rel hova DAMC thutkhawm vawi khatna niin he policy hnuaia Hnahthial District thlai tharte buaipui dan tur hrang hrang sawi hona hun neih a ni a. Hnahthial District a thlai thar awm ho leh thlai thar thehluttu awm zat hriat a, chumi mila chhinchhiahna (record) mumal a awm theih dan tur bakah thlai thar dah khawmna hmun tur -Collection Centre mumal tak a awm theih dan tur te he hunah hian sawi ho a ni a. Collection Centre mumal tak a awm theih nan ruahmanna siam ni se ti a rel niin tun dinhmunah chuan Hnahthial Town leh Cherhlunah te awm tura ruahman a ni.

Thutkhawmnaah hian Agriculture, Horticulture leh AH&Vety Department te chuan Handholding policy tan a Hnahthial District atanga application thehluh tawh te tarlangin an department theuh hnuaia hmalakna turte sawi hona hun an hmang a. Lo neitute thar chhuah chu market-a hralh chhuah dan turte sawi ho a ni bawk.

Lo neitu (Farmers) te chuan an mahni awmna hmun theuhva Society-te hnenah an thlai tharte chu an thehlut ang a. Society chuan thlai thar lakkhawmte chu Collection Centre-ah chhung lutin a buaipuitu tur line department chuan a leitu tur a lo zawn sak ang a. A lei duh tur agency-te chu auction hmanga chhantir tur an ni ang.

"District Sensitization Programme on Thlai Thar Marketing under Hand Holding Policy" chu tun thla ni 29 hian DC Conference Hall-a neih tura ruahman a ni.

Thutkhawmnaah hian Pu Zothanmawia Khiangte, Addl. DC; DAO & DAMC Member Secretary, Pu MS Dawngliana; Project Director, Dr Malsawmtluanga Fanchun; Pu Lalthakima, DHO; Pu Lalduhthlana, DFO; Pu T. Lalduhkima, DCSO; Pu Lalrinzuala, ADAO; Pi Rosalind Lallawmzuali, ADHO; Pu P. Vanlalnghaka, RO, Soil leh Sr. V.O. te chu an tel a ni.