2644/2024-2025

2024 Khuangchawi thla ni 22: Vawiin khan Lunglei District Legal Services Authority (DLSA), Lunglei Officers' Club (LOC) leh IQAC, HATIM te ṭang ho huaihawtin Higher and Technical Institute Mizoram (HATIM), Lungleiah dan lam zir hona leh zirlaite an hma lam hun atana kaihhruaina leh kawng kawhhmuhna, 'legal awareness cum career guidance programme' buatsaih a ni.

HATIM Multipurpose Hall-a programme buatsaih hi HATIM-a Assistant Professor Miss R. Lalfamkimi'n kaihruaiin, HATIM Principal Pu Vuansanga Vanchhawng chuan inlawmna thu a sawi a. LOC Secretary, Lunglei District Transport Officer Pu Beitlotha Nohro chuan thu a sawi bawk.

He hunah hian resource person pathum awmin, Lunglei District Additional Public Prosecutor Pi Chawngdingpuii Chawngthu chuan internet kal tlanga pawi khawihna (cyber crime) chungchang leh Mental Health Care Act 2017 chungchang a zirtir a. Lunglei District Sainik Welfare & Resettlement Officer Maj. Rebecca L. Chhakchhuak chuan zirlaite an zir lai leh zir zawh hnua an inbuatsaih dan tur te, hna vang tawh tak kara inelna hmachhawn thei tur leh mahni kutkawiha ei zawnna bul ṭan thei tura rilru put hmang dik leh nunphung ṭha te a zirtir a. Nursing School Lungleia Tutor Pi Lalthankimi chuan rilru hriselna (mental health) chungchang a zirtir bawk a. Zawhna leh chhanna hun hman a ni bawk.

He hun hi LOC office bearer leh executive committee member te'n an hmanpui a. HATIM Principal leh zirtirtute uapna hnuaiah zirlaite'n he hun hi an chhim a ni.

LOC hian September ni 13, 2024 khan Lunglei Government College-ah career awareness programme hi lo buatsaih tawhin, Lungleia zirna in hrang hrangah la buatsaih chhunzawm zel an tum a ni.

Attachment

  • Loading attachment...