Vawiin khan Power & Electricity Department Minister Pu R Lalzirliana chuan Serlui ‘B’ Small Hydel Project a khawl siamthat mek leh thawmthat hmabak la awm te a hmunah a endik a, he hunah hian Bialtu MLA Pu Lalrinsang Ralte, Thermal Project Division, Bilkhawthlir Executive Engineer Pu HS Vanlalchaka, Pu RC Lalzuiliana, SDO leh Pu Lalrinawma, SDO te bakah MNF General Headquarter a Organiser ten minister hi an tawiawm a ni.

P&E Minister Pu R Lalzirliana chuan Serlui ‘B’ SHP tih puitlin anih theih nana hmalakna hrang hrang kalpui alo nih thin dan te tar langin,” Hydel Project MegaWatt 12 lai pe chhuak thei a ni a, kawlphetha kan mamawhna tam tak phuhruk nana hmanraw tangkai, ram tan a rohlu tling a ni,” a ti a, Unit pathum awm zinga Unit-2 chu thawmthat mek anih thu leh reilote chhunga hman chhunzawm leh tura ruahman mek anih thu a sawi a,”MegaWatt 12 pe chhuak thei tur hian a tul anga siam that ngai te siam tha turin Sawrkar in theihtawp a chhuah a ni” a ti bawk.

Bialtu MLA Pu Lalrinsanga Ralte chuan ,”Serlui ‘B’ SHP chu khaw engemaw zat tan a eng chhit tirtu anih mai piah lamah MegaWatt 12 a thar chhuah avanga kawphetha chawk luh nana sum tam tak sen ral ngai tur lo vengtu hmanraw pawimawh tak a ni,” a ti a,” P&E Minister, Serlui ‘B’ hydel project thawmthat hna ngai pawimawh a, a hmun a rawn endik a rawn viltu kan nei hi a ropui ka ti hle a ni” a ti bawk.

Executive Engineer Pu HS Vanlalchaka chuan Technical report te pein, Unit Overhaul a pawimawh zia te a sawifiah a, P&E minister chu Thermal Project Division Bilkhawthlir a Quarter sak that ngaite leh Serlui tuikhuah a zin mite hip thei tura buatsaih mek thliarkar a hmalakna kal mek te a hmunah a fan pui bawk a ni.

Serlui ‘B’ Small Hydel Project a khawl te hi kum nga danah Overhaul theih a ni a, kum 2010 a hman tan niin Unit-2 hi overhaul mek a ni. Overhaul hian thla 8 thleng te awh thei in Cheng Nuai 72 vel sen angai thin a ni. Khawl pakhat hian thla khatah Cheng Nuai 115 man hu vel kawphetha siam chhuak thei a chhut a ni a, khawl pathum hi thawm that a hman tangkai vek a nih chuan Cheng Nuai 345 man hu kawlphetha pe chhuak thei tur a ngaih a ni.