Vawiin khan Power & Electricity Minister Pu R Lalzirliana leh Tualbung khawtlang hruaiteten VC Hall, Tualbungah Tuirini Hydel Project sak tur a Tualbung ram tui khuahin a chim tur leh heng ram neitute tana harsatna awm thei sutkian dan tur chungchang sawi hona hun an nei a, he hunah hian Pu Lalramliana, Engineer in Chief, P & E department, Pu C Lianlunga, Chief Engineer, Pu Lalduhzuala Sailo, S.E, Pu Vanlalsawma, SDO (Civil) Saitual te leh P & E department hotu dangte an tel a ni.

Power & Electricity Minister Pu R Lalzirliana chuan,”Tualbung khawtlang chu Mizoram in a kawphetha a mamawhna pung zel phuhru tur a sawrkar hmalakna dotu ni lo a, phal tak a in ram te hman tir tu in ni hi a lawmawm hle a ni,” a ti a,”Mihringte hi in mamawh tawn vek kan nih avangin tunah Mizoram sawrkar-in in ram hman a mamawh ang hian he khua hian hmasawnna kawng a zawhna hrang hrangah heng kawphetha a siam chhuah tur mamawhna pawh a nasa hle dawn a, chungahte chuan kan la tangkaipui theuh dawn a ni,” a ti. Pu R Lalzirliana chuan Tuirini Hydel Project sak a nih huna a pawhna tur kawng sial dan khawtlang hruaitute nen thlir hovin Tualbung Middle school leh High School te a tlawh nghal a, School building thawm that ngai laite a enpui bawk.

He hun hi Tualbung VCP Pu F Rothuama’n a kaihruaia, Tualbung mipui lo nei a eizawngte tan Tuirini Hydel project avanga lo siamna tur ram a tlem sawt dawn thu te sawiin heng an harsatna a chhawmdawl an nih theihna tur kawng hrang hrang Minister hnenah hian a thlen nghal bawk. P&E Engineer in Chief, Pu Lalramliana leh Chief Engineer Pu C Lianlunga pawhin Tuirini Hydel Project hlawhtlinna atan sawrkar hmalakna tlangpuite sawiin Tualbung khawtlang hruaitute chungah lawmthu sawina hun an hmang a, Tualbung VCP, MUP, MHIP, YMA hruaituten he project kalpui a nih theihna tura ram hman phalna ziakin an pe nghal bawk a ni.

Tuirini Hydel Project hi kawlphetha 24 MW pechhuak thei tur a ruahman a ni a, kum 4 leh a chanve chhunga sak zawh hman tura ngaih niin a sak na tur senso hi 465 Crore a ni. BRICS atangin Crore 335 hi dil mek niin Ministry of New & Renewable energy leh Mizoram in a bak senso hi an tum dawn a ni. He project sakna tur hian Khanpui, Lailak, Saitual, Keifang, Thingsulthliah, Seling, Sesawng leh Tualbung khua a VC pass leh Periodic pata ram 185 a huam dawn a, Hactare 380 a zau niin heng khua atangte hian ram hman phalna lak a ni tawh a ni.