23 Sector Assam Riffles te kaihruaia Delhi khawpuia  National Integration Tour(NIT) programme hun hmang, zirlai te chuan tukin zingkar khan Aizawl an rawn lut a. NIT programme chhimtu zirlai 20, zirtirtu 2 leh an mahni hruaitu Sipai Officer te hi Governor Kummanam Rajasekharan chuan 46 AR Basketball Court-ah Flag nen a lo hmuak  a ni.

NIT Programme chhimtute hmuahnaah hian programme tawi buatsaih a ni a. He hunah hian Governor Kummanam Rajasekharan chuan fuihna thu a sawi a. 23 Sector Assam Riffles ten Mizoram hmun kilkhawr zawka zirlai 20 leh zirtirtu pahnih te thlang chhuak a, India ram inpumkhatna pawimawh leh hlutzia zirchiang tura an hruai chu thil lawmawm tak a ni a ti a. Zirlai fehchhuah te chuan Delhi khawpuia an cham chhunga hmun pawimawh tak tak an tlawh te, an thil tawn te leh mi pawimawh tak tak an kawmna te bakah an thil zir atang te khan   mahni inrintawkna nasa tak an neih belh dawn a.   India ram inpumkhatna pawimawh zia zirtirna kawngah phur takin a penchhuak thei dawn a ni a ti. Governor Kummanam Rajasekharan chuan Assam Riffles te chu tualchhung mite tan theihtawp chhuah hna tha tak tak thawk chhunzawm tur zel tur te leh zirlaite khawhawi ti zau thei zawnga ruahmanna te pawh siam chhunzawm turin a ngen bawk a ni.

 23 Sector AR bultuma  National Integration Tour programme chhimtu zirlai 20 leh zirtirtu 2 te hian tun thla ni  7 atanga ni 20 thleng kha Delhi-ah hun an hmang a. NIT programme an hman chhung hian President Ramnath Govind, Boxer hlawhtling, khawvel pum huapa vawi 6 Champion tawh,  Mary Kom, Lt Gen. Asit Mistry, GOC, Delhi Area bakah mi pawimawh dangte an  kawm a. January 15 khan Army Day Parade puitham tak an chhim a, National Security Guard(NSG) Training Centre te, India ram History a lang pha Hmun pawimah, Hmunhma hlui leh In ropui tak tak te pawh an tlawh bawk a ni.

NIT programme atanga rawn haw te hmuahna hun, Flag in Ceremony for NIT hi Brig. S. Vinod, DIG, 23 Sector AR leh a hoten an kaihruai a ni.