Vawiin khan Tourism Minister leh Aizawl East II Bialtu MLA Pu Robert Romawia Royte chuan a pisa ah a bial chhung Aizawl East-II a local council member te nen inkawmhovin bial chhunga hmasawnna hna kalpui dan tur leh thil pawimawh dang te an sawiho.

He inhmuhkhawmna ah hian thu sawiin, Minister Pu Robert Romawia Royte chuan Aizawl East II mipui aiawha thlan tlin local council member te chu an bial leh ram hmasawnna tura thawhho puiah a sawm a, party in anlohna te dah tha a, mipui tana  lungrual taka hna thawh ho puiah a sawm a ni. Aizawl East II bialtu MLA ni bawk hian a awmna party ni lo atanga local council member atana a thlantlin te chu amah finchhuah tura a mamawh bik thu a sawi a, kalkhawm te chu an mahni theihna zawn theuha tanpui turin a sawm bawk a ni.

MNF sawrkar Pu Zoramthanga kaihhruai chuan langtlang sawrkar kalpui a tum thu leh thuneihna sem zai an tum thu a sawi a, hei vang hian an bial chhunga sawrkar hnathawh te chu local council member te hriatpuina veka thawh tum ani a ti a. Sawrkar hmasa in helai biala a hnathawh te chu a theih theih ang ang a chhunzawm tum anih thu a sawi bawk a ni. 

He inhmuhkhawmna ah hian Aizawl East II local council member te pawhin thute sawiin, a vawi khatna atana an bialtu MLA hova an thukhawm thei chu lawmawm an tih thu a an sawi a. Anmahni veng chhung hmasawnna atana mamawh hrang hrang te an sawipui bawk a ni.