2475/2024-2025

Saitual, the 10th October 2024: Vawiin khan Pu F. Rodingliana, Power & Electricity Minister chuan Tuivai Hydel Project siam tur hmalak mek chu 180MW tharchhuak thei tura tihpuitlin dan tur a hmunah a en.

Tuivai Hydel Project hi Central Water Commission (CWC) in 210 MW thar chhuak thei turin kum 1992 khan a DPR an peih fel a, hmalak zui loha a awm reng hnuah Mizoram Sawrkar-a Ministry thar pian veleh he project hi bawhzui nghal niin, a tir a 210 MW pe chhuak thei tura ruahman chu tuikhuah tur hian State thenawm Manipur ram chhung hmun thenkhat a chim ve dawn avangin, Mizoram sawrkar chuan tuikhuah chim chin hi Mizoram chhung pelh tir loh ni se a ti a, tuiin a chim chin tur tidanglamin MW180 tal thar chhuak turin ruahmanna a siam ta a ni. DPR te siam tha a, he hydel project siam thei tur Private Developer tha thlang chhuak a, tender chhuah leh Mizoram sawrkar in Agreement a sign pui thleng a buaipui tur Transaction Adviser ruatna atan Department of Economic Affairs, Ministry of Finance chuan Mizoram Sorkar chu pawisa cheng 2.3 crore rawn pein, heng thil pawimawhte buaipui tur hian Ernst & Young LLP te chu Mizoram Sorkar in transaction adviser atan a ruat a ni. Heng zawng zawng ti puitling tur hian Ernst & Young hian hma la mekin, Kum khat chhunga Tender chhuah fel hman turin tunah hmalak mek a ni a.

He hmalakna kal mek hi Pu F. Rodingliana, Hon’ble Minister, Power & Electricity Department chuan a hmunah tlawhin Tuivai khuahna tur hmun pawimawh laite fangin a tlawh a ni. Ruahmanna ang chuan powerhouse hi Phuaibuang ramah dah tur a ni a, tuikhuah (dam) hi Ngopa atanga Km 12 a hla, Tuivai-a Livawkkuang hmunah sak turin ruahman a ni. Tun dinhmunah Mizoram in kawlphetha a mamawh san lai ber 163MW vel a mamawh a, he Project hi tihpuitlin anih chuan Mizoram chu power-ah a intodelh thei dawn a ni.

Minister hi Pi K Lalrinzuali, Secretary, Power & Electricity Department, Transaction Adviser, Ernst & Young aiawh leh Department official pawimawh ten an tawiawm a ni.